Deibang hijou lou Lungset

Sadar Hills (E) Saikul a Class-XII kasimlai chun Class-X sim Neipie chu hatah in kana lungset in, hinlah phat kilemkom kanei theilou jeh chun kalunggel kana seidoh thei ji poi. Hinlah guhthim in kalungset nachu kalungthim ah kaching jing in phatkhat teng Pathen in pha asah leh kalunggel hohi seipeh tei ding tin gol-le-pai bang in kana kivoppi jon ahi. Ajeh chu Class-X simbep chapangcha ahi nahlai jeh a chu a-lekhasim ki-suboi kha inte tia kana gel ahi.

Phatkhat kom kom teng kihoumat nathei lampi aumleh ka-houpi jin, hiti chun galkang a kihe to mai mai khat bang in kana kivoppi ji. Hinlah phat ahung chal in, Class-XII kahin chai tan, Neipie in jong Class-X exam ahin chaitah phat chun khatvei kalungset nathu kasei tan ahi leh alung hang in imacha in eidonbut tapoi. Hitichun keijong BA simdin kalenna Ccpur lam kana jon tan, Neipie vang chun Darjeeling ana jon tan ahi. Hiche a kipat chun kiheto lou in kaumlhon tan ahin guhthim a kalungset na vang adai thei deh tapoi.

Chutia kum phabeppi hinkho kahin man nung chun nilhah khat imu theilou in kalupna a kaki ngaito in ahile kalungthim ah thil tampi ahung kilang’e. Hiche ni nilhah a kaha gelpen chu ‘ipi atileh tuchan a Neipie hin lungset mel’a eimu thei mong mong lou ahidem’ tihi ahi. Chuleh kum thum lam ahung che nung changei a hi kalungset nahi ahetthem lou ahi dem, ahilou leh kihet mosah joh ahi dem tin kagel-kagel jeng’e. Hinlah ima bolthei kanei deh poi.

Ihamkhat ti kagel le kalha ase jin, “Konba eitobang hi ipi ding eiti ding ham?” tin kagel kitji. Hichun kagelbe kit in ahile BA jong Final year hiding kahi tan, Class-XI/XII kasim lai a pat a kahin lungset nun tuchan a eidonse lou chu nommo kasah lheh jeng’e. Abang leh Neipie hin kilungsetpi anei ahi tadem tin kagel jin, hinlah keibon eiha houpi nom louleh akom a lungset thimthu lal Tangpa dang ho jong hiti hin ana bol bou inte tin kagel kit jin, kachangseh-in kahung kilhamon ji.

Hiche ni jaan chu ka-imut theilou jeh in WatsApp kagah hong in ahile ka-contact neisun chu koima ana Online tapoi. Hichun pung kavet le Jaankim lang ana hitan, mi imut phat mong mong vang ahi thou tai tin kagel’e. Bolding hetlou man in kalupna a chun Facebook Log-in kabol in ahile Friend Request khat ana um in, accept kabol masang a Profile kavet masat le kahetkhah mi toh kilou kasah lheh jeng in hinlah koipen ahivang kahedoh vah poi. Amel hoi kasah jeh chun hoitah in kave in ahile kalungsetpen Neipie tohchun kilou kahinsah in, hijeh chun Photo Album hochu aban ban a kavet leh ama ahichu kahin hedoh pai tai.

Hichun chomkhat kakigel in ahile kamukhah nalou kumthum lam hung che ahitah jeh chun alim chu kikhel kasah lheh jeng tai. Neipie toh kaki muto na anunung pen chu Class-X asim lai ahi tan, ken Class-XII kasimlai ana hitai. Hinlah tun kei BA Final kahi tan, ama jong BA simlai khat ana hitai.

Adeh in mi-gam a um ahijeh in avouso ahoijin, masang a Manipur thinglhang Gam a aumlai sang in gamcheng in ana melhoijo tai. Hijeh chun alim chu vetnom nom aumjeng’e. Hichun kenjong khongaisot talou in Friend Request chu ‘Accept’ kabol pai in ‘Nao, koicu nahi h ty…k het khh sa th nkilw e’ tin Inbox in kagah dai in ahile ‘reply’ vang eihin bol tapoi. Reply ahunglou jeh chun ipitia tutah a Friend Request hinbol a eihin Reply lou ahi tadem tin a-Profile kave in ahile Log-Out ana hitai. Hichun kenjong ‘mgfa’ kati in kadong man’in alim hochu hoi kasah lai lai download kabol jin, abang chu ‘Like’ jong kagah bol pai pai jin ahile kahetlou kah-in Ahmasa ahung khong tan, keijong ka-imu tai. Ahin kihet khah lou na sot ahitah jeh chun ‘Comment’ vang kabol ji poi.

Ajing jingkah chu vaigei thim’in kahung thoudoh in, hinlah thildang imacha boipi masa lou in Facebook ah kalut pai kit in, reply ahung dem tia kavet le la imacha ana umdeh kit poi. Hichun ka-Facebook messenger chu kavet le ‘Active 11 hours ago’ ana kiti nalaiye.

Reply imacha kamulou vang chun sun nilhum kei in Neipie bou kagel in hinkho kamang tan ahi. Abang kom leh phatseh a kamukhah la ahipon, gal a kiheto jing jong kahi kit lhon deh pon, ipi atileh hibangse a chu kagel jeng ahidem tin kei-le-kei pichu kaki detmah lheh jeng’e.

Hiche ni chu kahetlou kah-in phat ana chal in nilhah ahung lhung pai kittan ahi. Nilhah buneh chai chun ka-room kajon in lekha simding kagot le Lekha him him kalung ah aum thei tapoi. Keijong kalungdon man in T.V. kave kit in, ahivang in kalung alut deh tapoi.

Hiphat chun ka-Room ah kalut in Laptop chu Dongle toh kasuhto a Facebook kalut kit le Inbox message khat kamu in kavet le ‘Ulun..nei ht lw t og. Neipie kahi chume.amasa a Saikul a ina umkhom jiu cu naht lw tm’ ana kiti-e.

Hiche message kamu mu chun kavet leh Neipie chu ana Online pet ahi in, ken jong ‘O, chapang na hm k t a na2 nungah tah hi o na’ tin kadonbut in ahile ‘Ulun..chapng nei t t hh ta, b.a sim kahi th cu’ tin eihin donbut-e. Hichun kenjong ‘Akhu t le nungah nahi hita a nakom a hng leng dng golhang jg tm taveh ta o na…’ tin kadai in hiti chun chomkhatpi kaki-Chat lhon’e. Chomkhat jou, jaan ahung gei phat in ‘ulun…gdnyk, swet drimz…’ ahin ti in athip del tai.

Hiche ni jaan chun kaki gel in Neipie chu iti ana kikhel a hibang a hi ana hoichom ahi tadem tin masang hinkho chesa hopou kagel in kachangseh in kame-kame jeng tan ahile ka-imutlhah lam jong kana he tapoi.

Phatsotpi kiheto khalou a kaum nung lhon a hung kihoupan kit kahi lhon vang chun Kumthum masang a pat kana lungsetsa ahijeh chun hetmanlou in kalunggel chu athah beh in ahung khangdoh in Neipie bou gelnan hinkho kahin mang pan kittan ahi. Tahsa a kimupi ding la Darjeeling langpeh a um ahijeh in ahithei pon, phone beh in kiki houpi ji leh pha ding ham tia a-phone number kathum kit leh phone choilou ana hikha kit-e. Aman phone achoilou jeh chun Facebook a jong phatseh in aki kihoumat thei pon, hiho pou jeh chun phatseh in lungkimlou nan kadim jitan ahi.

Phatseh a kiheto theilou, kimuto khalou kahi lhon vang chun aguh in Neipie kalungset nachu ana khanglien jep jep tan, ki-umkhom hen lang kalunggel ho chu lungna chimset in kiseipeh theileh tin kagel jin, hinlah hiho chu ahithei ding imacha aumpoi.

Bolthei dang la kaneilou jeh chun khatvei kom kom leh Facebook Inbox message kathot jin, hinlah reply ahung khah jilou jeh chun kadipdam na akibe lo bepji tan ahi. Khatvei tou reply ahung jong leh Neipie la Online ana hikit ji tapon, iseinom ho aki seithei deh ji tapoi. Deibang a aki kihouthei lou chu kalunghan pi jin, abang kom leh kahet lou kah in facebook message ah kana houset lo jitan anung teng kiphatlam nan kadim ji tan ahi.

Hitihin hetmanlou kah-in phat ana chal in Neipie jong a-College kai first year ahin chai tan, ken jong graduate kana kichai tan ahi. Hinlah deibang in lunggel seina ding phat kamu deh poi.

Neipie chung chang thu eiseipeh thei la koima aumpon, lhangphong tah-a kihoumat nathei lampi holding jong a-insung mite lunghan nakhat hikha ding ham kati kit-jin imacha kana bolkit tapoi. Hinlah lungguh in vang kamil thei dehpon, kaching jing’e.

Alangkhat a, Neipie kalugsetna asan chehcheh phat chun nikhat kaloipa Lalboi kom’a  kalunggel ho chu kasei tan ahile chutobang lunggel neikhalou kahi jeh chun ei-detmah lheh-e. Ahin kineplalna kanei lou jeh chun kaloipa titahlou ka-insung mite kom jeng a jong Neipie kalungset nathu hochu kasei pan tan ahi.

Kalunggel hochu ahetphah louding vang chun khatvei kom kom leh Neipie hin kalunggel hi eihetthem peh nante tin kagel jin kei-le-kei kaki lhamon jin ahi. Bolding dang kahetlou teng leh Facebook a chun Inbox kabol-kabol jin ahile tampi pi ana phaman ji tai.

Hitia phatseh a Inbox kabol jing nung chun khatvei Reply ahung in kavet le ‘ulun, na thusei g dn h epi hm1 um th akilw e.hihi…’ ahin ti. Hiche kamu mu chun kipanan kadim in Neipie hin kalunggel eihet peh khat tou hinan te tin kagel tan ahi.

Ahin angaima bang in phatseh a Online jong hilou, contact no. jong kanei ahilou jeh chun seibe ding ima kahe deh poi. Keijong chutia hinkho phat sotthim pi kahin man nung chun nikhat message saothim tah-in kajih in Inbox message kathot in hinlah hiche jeng jong chun reply ahung deh poi. Hiche phatchun lunghang khat tou ahi khadem tin kiphatlam nan kadim kittan alung han khah jong le ei-hetthem nadin kathum jo kittai.

Hiche kikah lah ahin Neipie X-mas mang in ahung potdoh-e tithu kaja tan tuchung beh ki-kimuto tei hen tin kagel tan ahi. Hiche hi niengkum 2014 December chu ana hitai. Hitichun ama contact nathei phone no. kaki ngaito in hiche apat chun ol ol in kahung kihou thei lhon tai. Hinlah phat jouse a kihoumat jing thei kahi lhonlou jeh chun kipana jouse hetmanlou kah in ana dailha jitai. Hijeng jong leh tuchung beh aumna Sadar Hills Saikul ah X-mas mang in kiche intin lungna chimset in ilunggel ga-kisei tante tin kaki gel tan ahi.

Hijeh chun kenjong sms mangcha in Sadar Hills Saikul gache a akho uva X-mas gaman ding tia kaki gel jong chu kahetsah tan ahi. Hitichun X-mas hung lhun ding chu kinemtah in kangah tan, Neipie toh kimuto ding bou chu kalungmit in kagel-kagel ji tai. Chutia nikho phabep ache nung hin khatvei Facebook ah reply eihin bol in kavet le achai na lam achun ‘ulun kacung ah ana lng nm mo hih o ki lgst p kany ty’ tin ana kisun’e.

Hiche kasim doh chun lung nopmo nan kadim in imacha seibe ding kahe tapoi. Hoitah a kagel le kum-thum kum-li Neipie toh kimuto a lunggel seiding tia kahin nga hi hichan bep ding hitam tin ka-ngaito in, kigel lhah na pen jong kanei thei tapoi. Hinlah chutia message kamu jeng vangchun Neipie kalungset na adai deh pon, achung a kakinepna jong neokhat cha akiem poi.

Abang komleh katahsan jipon, message ijat kathot vang in la reply ahung deh tapoi. Kadongman in khatvei vei kaki lhaset jin, abang leh seilou ding pou pou jong kana seidoh khaji. Facebook ahung Online pet jong le Reply ahin bolji lou jeh chun kadip adamlheh jeng jin, kalunggel eiga seipeh ding la facebook messenger tilou kanei deh ji poi.

Hitia phat chomkhat kaum nung lhon chun lungkim na la kanei him him pon, lhaset naleh lung nopmo nan joh kadim jing tan ahi. Hijeh chun nikhat chu phone kabol kittan ahile ka-call chu ahin la in Awnem heo tah in eihin houpin, hiche chun kalungthim kipanan ana dimsah man in ahi. Hinlah thu umdan ho lungna tah a kasei leh ‘FB hunglut jichu kei kahi poi, kaloinu joh ahibouve. Hiche hochu ken imacha kahe poi’ tin ahin sei in ahi. Hitia ahinsei phat chun keijong kalung adong lheh tan, akhuti le ‘Nei lungset lou ham’ tia kadoh pai leh network hoilou jeh in Line atan pai tai. Hiche jouchun vel ijat ka-call vang in ka-call doh jou tapoi.

Thil umdan hochu kalung adong lheh tan, ajo jonan kaloipa Lalboi kom’a kache in thil umdan hochu kasei tan ahi le aman jong kaloiho dohthei khat kahe-e ati in aloipa chu phone in adong tan ahi. Hinlah aloipa in phone a chu ipi ahin seipeh ham tivang keikom a asei doh nom tapoi. Hichun ken jong Neipie kalungset dan thu ho chu avel vel in kasei jeng tan ahi le kathusei hochu hoitah in angailha in hiti hin eihin donbut-e:

“Bhai, Neipie jong nungah chapang ahi nalai in nang lunggel toh ama lunggel kibang lou ana hikha maithei ahi. Ajeh chu nungah atamlang in akum kibahpi atiuve. Chule na umchan na thusei dan hojong chu mi lungset thei nahipoi” tin jangpet in ahin seitan ahileh kalung nopmo nachu akipeh be abang jeng tan ahi.

Hinlah ima seidoh vah thei lou in hitichun kaum den tan ahi leh kaloipa chun ahin seibe kit-in, “Bhai, Neipie ichan a nalungset ham kenjong kahe nai, hijong leh tua nalunggel naga seikhum ding jong chu ahithei behseh poi. Hijeh chun ima seibe da tadi phot in. Among a eiho la imacha kihi loulai a kon ipi ding eiti diu ham. Tulai numei hon aching-athiem, ahiloule service neiho bou adei-u ahitai. Phale sele gamchom a hung seilen khat in Manipur thinglhang dalha khalou ho ipi ding eiti diu ham? Tua aki lungsetpi pa jong khu eini matih ahipoi” tin eihin seipeh tan ahi.

Kaloipa in chutia ahinsei phat chun adongmapa chu itobang mi ahi kadong in ahileh lekhathem tah officer khat ahi chu kahin hedoh tan keijong kahung kindoh in ahi. Ken kapohnat pentah chu tua aki lungset pi pa toh hin Darjeeling apat ahung potdoh jou a bou kiheto ahi nalai lhon’e. Hijeh chun Neipie ding a imacha kahilou dan kahin kigeldoh in lhaset nan kadim jo tan ahi. Ama ding a imacha kahilou kahin kihet doh phat chun Neipie in ei-hounom jilou jong kagelse tapon, mihem in eima kibahpi bou kivet ding ahibou’e tin kagel tai. Ahin kumthum val kahin lungset ahitah jeh chun kalungthim ah kapona lheh jeng in ima kabol theideh lou jeh chun kalungnat naho chu koima kahetsah tapoi.

Hiche kikah lah ahin X-mas ahung lhung tan, Neipie te kho a nomtah a galen ding tia kana kigel chu kahin geldoh in guhthim in lung genthei tah in hinkho kamang tan ahi. Inn-lang a che ding jong kagel thei tapon, hijeh chun Phai a kaloipa kom ah Christmas leh New Year sung se se chu lung nommo tah in kaum tan, hinkho genthei tah in kamang tan ahi. Hinlah kalungset na la adai thei deh pon ama bou gelnan hinkho kamang jing nalaiye. Hijeh chun kaki gel in Neipie hi chutia miching-mithem dei mong ahileh lekha hasim a sim a Officer lientah khat hiding kagel tan ahi. Hitia kaki gellhah phat chun kalungthim ah kei-le-kei kaki donbut in “Neipie, hinkho a ding a kalungset nahi tun hethem hihjong le chun phatkhat teng hin hethem nan nate… chihna thepna neilou kahi jeh in kalungset na jong deibang ahijou tapoi. Nang vang hamjang pha inlang Chungmangpa malsom na chang maitan...” tin kaki lhem tai.***

(This story was published by KHOHUI Monthly Magazine in June-July 2015; and was dedicated to someone special)