Kamil theilou meilhei nungahnu

Nilhah khatchu kaki ngaito to le ipi tia hibang a hi kamthip a koima tohjong kiheto lou’a kaum ahitadem tin kei-le-kei pichi kaki oimo lheh jeng’e. College kahungkai nala kumni lam alhingtan hitia pihi kaum peh peh le hithei louding ahi tin kaki gel’e. Hinlah mihem khat in i-hinkho mandan chula nikhat kah a kikhel jeng theilou ahijeh in alonaje aumdehpoi.

Mi kaki hetpi aumle phone no. kakilah kitji thou’in hinlah min eihin call loule ken koima behseh ka-call jipoi. “Pasal la kihi ngal’a…” kati jin khatvei tou nungah ho agah ki-call a phate a mi ahin houpi lou uleh kaki phalam pai kitjin nung-call ding kagel thei ji tapoi. Nungah phone a gah kihoupi ding kiti chu eimi ahile aphajep in jatdang ho vang hoitah a iki hetpi ahiloule upai aumpoi. Adeh in meilhei hohi kiboltheisah jep dan in aum uvin kivoppi ding kiphatlam um kasa dehset-e. Hijeh hin amahon eihin houpi masat lou-ule kamoh houpi jipoi.

Phat chomkhat jouvin college kahung kaipan kit tauvin final-year kahi phatchun mi atamthei pen a kihetpi ding kahin geltan ahi. College kahung kai kai tauvin ahile Milhei nungah ka-junior phabep khat chun eihin hebol lheh tauve. Eimuteng ule phatah tah in eihoupi jiuvin eingailu mong mong abang jiuve. Pasal jong hilou meilhei-numei hon eihin ngailutbol uchu kadetmah lhehjin hinlah numei toh kivop kha behlou kahi jeh in kakipah kitji thou’e.

Abangkom teng kakigel jileh hiche hi First-Year le Second-Year a class a mark sangmupen kana hijeh hitei inte tin kagelji. Akhutile mark sangpen mulou ana hileng meilhei hochun donse a einei diu katahsanpoi. Ahin vel ijat hamkhat hoitah-tah a eihin houpiji phat uchun kahung ki-ngeldoh tauvin phone number ho jong kahung kipeto tauve. Hinlah Meilhei numei ka-classmate ho phone a aki houpi le mi phatahtah a ahoupi jilou jeh uvin phone bolding jong kangaito khapoi. Kimuto a kihou tilou chu adang umlou ahijeng’ e. Hoitah a kavet leh jatdang hohi ajonchih jep uvin kisuhto chan in ipi aphachom aseidoh dem tin exam lam toh kisai thu hobou eidong ji uve. Hijehchun kenjong kathei kham kham in kahet hochu kaseipeh jiuve.

Hitichun kahung kivop vop uvin ahile amaho lah-a nungah khat chu hoi kahinsah tan guhthim in kahin lungsetkhah tai. Hinlah meilhei ahijehchun imacha kaseijipoi. Kagel jile eimi nungah ho bon koima ei-khotuo ding umlou’a meilhei nungah hon ipiding eiti ponte tin kei le kei kaki gelji. Kakisuhto teng ule vang mi-ahoupi dan achomjep jin mi-phatah hidin kagel’e. Amanu chu Pa neitalou, anu le asopi numei  khatbou toh chengkhom mi-chaga tah ahi.

Nilhah khatchu ipi mong-mong ahin sei’em kive patep hen tin sms khat kagahthot in ahile kipahtah in eihin reply in hiche nilhah chun phat chomkhatpi sms kaki text lhon’e. Hiche ni a kipat chun meilheinu tohchun ol ol in kahung kivop lhon in phatchomkhat jou in lawi kingaitah kahung bang lhon tai. Class umlou kahleh College Park lah dung-a katouji lhon in hitichun kaki houlim lim ji lhon’e. Abang le thudang dang kaseiji lhon in, abang teng le lekha toh kisai in kaki houlimji lhon’e. Second Year simlai ahijeh chun amaho syllabus ken kana lelhahsa hochu hil theithei kahiljin ka-notes luiho jong kapeji.

Phat chomkhatpi kahung kivop sunglhon chun mipha ahidan kahin mudoh tan guhthim a kalungset najong ana sang chehcheh tai. Kidei-kingai kahilhonlou vang chun nikhat kimulou a hitheilou dan in kahung umdoh lhon tan, suty ni dung jong le phone in kaki houhou ji lhon’e. Nilkhat chu kaki houlimpet lhon in kalung a thilkhat ahung kilang in keini kah a amin khelding kahin ti tai. Hichun kenjong “Ngailut tum’in namin hi Suukyi tin nakou tang’e” kati peh in ahile aman jong “Da, ipi ding a em?” tin eihin dong in kenjong “Myanmar a Aung San Suu Kyi khu ka-ngaisang tahkhat ahi. Nang min toh pronounciation jong kiha khehlou lou’a… Among a Aung San Suu Kyi kangaisang bang a nang jong kangailut nahi…” tin kadonbut in ahileh eihin vechangmel in “Nang in nadeitah a neikou nachu ima akhoh poi” tin eihin donbut-e.

Hiche ni a kipat chun college gache a Suukyi mel muding kal kangahlal jin jingkah a kipat sms in kahoupi pan jitai. Suty ni dung teng le jong sun nilhum lhum in phone in kakihouji lhon in akidei-akingai kahi lhon lou vangchun ki-homthoto tah in hinkho kamang ji lhon’e. Ama jeng jong nikhat tou eimulou le ahitheiji tapon, ka-hinkhoman lhonchu jatchom beh ahitai. Chuchan a kingai tah a hinkho kamanlhon tah vangchun kalungset dan kamcheng in kaseidoh kha hihlaiye.

Ka-mihina mong mong’a mi-kamthip kahi in, ahung paodoh ngalle seiding-seilouding helouva paojeng hokhu kahikit in genthei kakisa lheh ji. Suukyi jong hi phatseh in kalung hansah jin hinlah hichu ei-hethem kitji’e. Amahin phatseh in kalungthim akholjin ka-mihina kalval a chonding agel khapoi. Kei deisah lamjoh athupisah in khoto tah in ei-kivoppi joji.

Ka-kamcheng a lungsetna thu kasei khahlou vang in Suukyi in guhthim’a kalungset dan jouse ahetthem soh dan in kagel tan lungmon na khat kanei’e. Mipha ahi dan kahet nakhat chu thinglhangmi hijeh a musietna imacha aneipon ‘hichehi aphakhopset tai’ tin kagelji. Kei eingailut dan chu meilhei nungah dang toh kikhe kasalheh jin kangailutna achom lheh-e.

Nikhat chu College Park a katou pet lhon in “Leiset chung a hin numei kalungset tah khat aum’in, amading hin bolngamlou neipong’e” tin kasei in ahile “Amachu koiham?” tin ei-dong in seidoh louding tia avel vel’a kasei vang chun anompon eidong tei tei tai. Aki seidoh loule hithei louding ahiphat chun “Amachu kanu ahi” tin kadonbut in ahile lungdong thim tah in eive in chomkhat jou hin meseu in ‘ama ban’a koi ahi’ eihin dong kit-e. Hichun kenjong ‘kanu ban’a kanao te ahin, amaho ban in jong ka-insung mite tampi aumnalaiye’ tin kaseipeh-e. Hichun aban eihin dohbe kit in kenjong aban ban in kasuhsim in achaina lang chun “Nang hi 25-30 na lang in napang’e” kati le eihin nuisat-e. Anuidan chu kipanan adim in keijong guhthim a kakipah lheh jeng’e. Tulang a hi hoitah a kagel’e akom a kathusei chu numeikhoh thim ho hile ei-bophoi ding dan ahi! Suukyi vangchun gelset malah kanu a kahinpat a kalungseppen ho lah a ama 25-30 lhinna langpeh a kapansah chu eikipapi joi.

Suukyi hin akom a kaseidoh jouse lunglut tah in angaijin kathusei khatcha aniel khapoi. Innchen hahsa, neilou-ngalou kahi jong hoitah in ahethem in lungthengsel in eiki voppi’e. Amajong mi-neijoute ahilou vang chun ajochan a kithopi din eiseijin abangkom leh kiphatlam nan kadimji. Keiding a it-neilou a kipe ahijeh chun kenjong amading in imacha ka-it kitpon ‘kabolthei sun’ tin lekhalam a kaki thopi jing’e.

Hinlah chuchan a kakivop lhon a chuchan a kalungset vangchun khatvei vei teng ‘hiche nu hin exam a ding lekha ima adeichat jeh a ei-kivoppi khattou ahidem?’ tin kagelji. Hoitah a geldin vang hiche ho toh chun vetchep thei ahinaisai poi. Ahin jatle nam, hou le bih kibang akihilou jeh chun aman kalungset na ahet kalval a achalbe ding kagel theipon, hitichun hinkho kamang jitai.

Nikhat chu Canteen a katouna lhon’a kitimjou talou in kalungset dan thu hochu kahin seidoh khatan hinlah Suukyi chun kalungset dan ahetsoh kei ahitah jeh chun imacha tijatnan aneipoi. Kalungset dan ho kaseijou chun thinglhangmi-phaichammi tia kikhen naho, hinkho a chenkhom ding ahahsat dan ho jong kasei in chule ka-thusei hojong chu aselam’a agel loudin kaseiye. Hitiho kasei jouse chu aman jong ahethem in seibe ding ahepoi. Chomkhat jou hin “Dada, eini hi tribe khat a ana pengkhom hita lehen iti anop tadem na!” tin ahin seidoh in ahile kadiplai avotlha jeng’e. Lung la kalungset lheh in, ahin kichenpi ding la kagelthei kitpon keiding chun ahahsa lheh jeng’e. Ken kalungset na kagenthei pi bangchun aman jong gentheipi lheh inte tin kagel’e. Abangkahlah leh service hamkhat kinei tahen lang ki-kipui jeng leh tin kagelji. Meilhei khat thinglhang a puidoh a Zoulei konsah ding chula ahithei pon, keidingchun upai aumpoi.

Nikhat katoukhom lhon’a kaki houlimlim pet lhon in kahetlou kah in kamitlhi ahung luongdoh in “Dada, ipidia nalhi luong ham?” tin akhut in eihin thehpeh in ahile kahung kindot-e. Seiding helou’in chomkhatpi ka-ka den in chujouvin kenjong “Suukyi, nangna eigeedamak wabibase sum khallaga pukning yam nungshirak-e…” tin kadonbut-e. Hichun “Dada, hitichun sei hih in, keidin jong anompoi… Hung in ipi hamkhat gane hite…” tin kada sasan Hotel lam’a eipuiye. Hiche ni a kalunggel chu eimi nungah hijat hin kitoh ta a koima ei-khoto ding umlou a chuche jatdang numei khat in ngailutna neitah a ei-kivoppi chu kapohnat ahi. Eimi nungah ijat hamkhat meilhei gollhang toh garineo a kisuhpoh-kitoupoh uva keiding a kivoppi ding chajong aum jilou chu kadipdam ahi; ajehchu imajouse chu ka-neilal kangoh jeng ji ahi. Kumni le akeh tobang college kahung kai sung chun ka-lawi garineo neiho chu nungah hon akiha voppi uvin kei tobang second-hand kivon hochu mihem in jong eigelji pouve. Sumle pai neijep ahiphot le kol-le-vai jeng jong anungjui ding akivat pon kagelleh lhasetnan kadimji tai. Hiche ho chu thoh joulou a kahetlou kah-a ka-lhi ana luongdoh ahi.

Hiche nikho chun kilhalal tah-in kaum lhon in khojin konlam gei in College Park ah katou lhon’e. Nilhah in kachang in kakigel in ahile ‘Suukyi hi kalungset mong mong dan ahitai’ tin kagel jengtai. Hinlah meilhei ahijeh seh seh chun akom’a lungsetna thu seiding kagelthei dehpoi. Ken kalungset keu hilou a aman jong ei-lungset mong mong ahidan kahechen tan, lungset nathu kiseijong le agelkhel din kagel tapoi.

Suukyi chu kaki voppi maimai ahi tapon, kalunggel ngapna a kaneikhat jong ahitai. Aman jong ahahsat-agentheina jouse keikom’a aseiyin kenjong kalunggel ho seinan kaneiji. Nikhat chu meilhei ten amaang-aseng atiu thu ho ah kaki houlim lhon in ahile meilhei ten thinglhang miho amuset dan tampi eiseipeh-e. Ahin “Keivang chutobang kahipoi. Keidin phaichammi-thinglhangmi kiti aumchom pon, amaang-aseng jong aumpoi. Tribe kaloi tampi aum in kanekhom-kadonkhom jing uve. Hinlah ken hitia kagel vang hin ka-insung miten Bamon kahijeh uvin kakichenpi diuvalom hobou toh kichensah ding eiti uve” tin ahin seiye. Hichun kenjong ‘insung mite thusei ngaichu eima ding’a hamphatna ahi’ tin aphalam tah in kaseipeh-e.

Meilhei toh kichen ding kagel theilou nahi neilou-hahsat jeh jongchu ahinan; meilhei toh kicheng ho i-society uva muda achan jengjiu jeh jong ahi. Adeh in eimi abolthei thim khat meilhei toh ahung kichen le koiman mihem in iseiji tapouve. Hiche hi kagelle ‘Ijemtin khonung in meilhei toh kikicheng henlang Officer khattou hung kihi khaleh mi-seiset kichang ding ahi’ tihi kahagel thupi ahi. Hijeh a jong hi Suukyi chu kalungset lheh vang a kitim ham ham kana hi.

Hicheho pichu kagel le Suukyi tohhin ki-kivop vop le khonung in hung ki-kipelkha inte katin kalungthim a tijatnan kadimji tai. Kahina a vaetdin koi lungset thei chi kahipon, hinlah ‘mihem hinkho ipi akito ding seithei ahipoi’ tin machih ding kahin gel jotai.

Chutobang lungthim kahin gel ni’a kipat chun Suukyi toh kilhakang jepjep tahding kahin ngaito pantai. Hinlah nikhat jeng jong melmu lou’a hithei kahi tahlou jeh chun hahsa kasah lheh-e. Suukyi kalungset nachu themkhat beh adai thei khatleh tin nungah dangdang jong kahel jin hinlah aphachom dehpoi. Ahin mihem in bol tang’e akiti le ipiti kijoda ding ham tin hatah in kakibol in kigamlhat nadin pan kala tai. Hichu nikhatsuh a hithei ding ahilou jehchun ol’ol a kigamlhat pi ding kaha gel thupi joi.

Phat chomkhat jou’in Final Exam kahinchai tan, niseh a College kiche talou ahijeh chun kigamlhat nathei chance ahung hoijep tai. Phone a kihou jeng jong kasulhom jepjep in hitichun ol’ol in mil nading kangaito’n, nikho phabep jouhin ka-phone number jong kakhel in Suukyi kahetsah tapoi. Hitichun kabol in ahile kahung hithei jepjep tan, nikhat jengjong mulou’a hitheilou pa chu tunvang kamulou jong le ima’n kagel tapoi. Khatvei vei kageldoh kom tengle vang lunggel genthei nan kadimji nalaiye.

Ka-hinkho mandan chu mikom’a seidoh ding jong khattou in einuisat inte tin kaki suonglal jin koima kom’a kaseidoh khapoi. Ajehchu eimi hile khohlou ahin meilhei ahijeh chun kagel nalam jouse boidan in kamuji. Hitichun phatjong kumkhat langpi ahung chetan, kenjong kahin haimil thei tai.

Chutia ol’ol a kahin haimil thei phatchun nikhat kaloipa Seiboi kom’a kadinmun chu kaseipeh tan ahile kagel phahlou beh in eina kipapi in hatah in eina pahcha’e. Meilhei lah a hung khanglen ahijeh in meilhei ho hindan ana hethem in meilhei nungah khat thaang’a kon hung toldoh dan’in eina ngaito’e.

Seiboi hi kaloite lah-a eikineppi mama jeng khat ahin, imacha kahilou vang’a sangtah a eivet ahi. Hiche jehhin ‘Suukyi chun mi-khat hungsoh ding’a namu jeh a na-lungset bang kisa ahi’ tin eigel’e. Kenjong hoitah a kagelle Seiboi thusei chu dih din kagel in ijemtia anadih tahhih jong le meilheinu toh kakikhen theichu pahajeng’e tin kagel’e.

Hoitah a kagel ji teng Suukyi chu mi-jonchih tah hiding ham tin kahin geljin kana kikhenpi chu kei-le-kei jong kaki pahchaji. Ajeh ima umlou’a chubang a kana lungset jeng chu kagelle meilhei ho thinglhangmi ho lung holje athep dan’u kahin hedoh tan eimi meilhei toh kicheng hojong kaseise ngam tapoi. Hoitah a kagelle ei-thinglhangmi sang in amel’u ahoijon, chihna-thepna lam’a jong eiho phahjou ahipouve. Thusei-lasah, chule umchanje athem in imalam jouse a eimi nungah hotoh tethei ahipoi. Anu-apa masang a kitup tah a hinkho mang ahijeh in tahsan lal nading kamupon, ki-kicheng jong le kisih nading aumpoi tin kagelji. Ni-mulou lha-mulou’a hinkho mang ahi’n hijehhin zoulei apat hung seilen ei-thinglhang nungah toh sun le jaan bang jeng ahi.

Alangkhat ah eimi nungah meilhei gollhang ho nung’a suhlen-toulen hojong kahin geldoh kit-in, amaho jong ka-oimo tapoi. Ajehchu agam uva cheng ahijeh uvin aneijou uvin neile gou a tethei akihipoi. Gari adeidei nung’a tou nathei, sumle pai vadlou hiel a man nathei khat kom’a kon toldoh ding chu nungah lhomlheh ding ahiye. Koima neile gou, sumle pai nengjeng jung a manding deilou umlou ahijeh in eimi nungah meilhei gollhang ho nung’a lheile le hojong oimo thei ana hilou dan ahi.

Hinlah akikheh nachu meilhei-nungah hon eimi pasal khat phatah a alung ahinhol leh akicheng teiji lhon’in, meilhei gollhang khat leh eimi nungah khat ahung kingai leh sotlou’in kikhenna ana masa jitai. Hijehhin hoiche chu hijong leh apha ahilou jeh in kichih thei phot angaiye tin kahin gel tai.

Suukyi tohchun akingai jong kana hilhonlou jeh chun midang dia nuijat umtah himaithei ahi. Hinlah keidia vang ama toh kikhen chu thilbai ana hipon, kumkhat lang achetah vang in kageldoh komleh kalaidip adapji nalaiye. Ama bang’a kalungset ding jong hung umkit din kangaito tapoi.

Vel ijat a asiet nading kagel’a ijat a aphatmo nading kangaito ji vang in ka-lungsetna anom jipon kei ei-lungsetna vang hi lungsetna dihtah hinante tin kagel kitji. Kalungsetna jouse kahetsah nung’a kanungsun chu kagelleh kaki oimo jin kalungthim a themmo kakichan ji. Hinlah ache chu ache ahitan, aphalam a kilah tilou adang aumtapoi kati kitjin kei le kei kakilhem lungmong jitai. Ahin kalungset na vang adai theipon tuchan hin meilhei nungahnu chu kamilthei tapoi. […]

(This Fiction/Love Story was written for Laijon Digest, yet to be published)