Kamil joulou kalungset Nelly!

December ahung lhun a Christmas ahung nai phat in kanu in Second Saturday ni leh Bazar kai in che hite tin ahin sei in, keijong office suty kahijeh chun kipah tah in kana noppeh in ahi. Service kamu na sotloulai, Kanu toh jong Bazar gakai khom khalou lai kahi jeh chun katha jong anom lheh-e. Bazar che thanom behseh vang chu kahi pon, hinlah Kanu ngaitah in Christmas kon teng mi atam jival in che ding thou thou aha tam masang in kichedoh hen ati ahijeh chun kagel le pha jong kasah in hijeh chun Bazar kai in kana kilhon pi in ahi. Ahimong in kumkhat lhung kei a khatvei vanlhah Bazar kaiji ahijeh in kagel khohpeh in Bazar lah dung ah kaga lhonpi le in aman atu-achate ding von ima akivet in ahi.

Phaisung lah chu aban ban in kahin chon lhon in ahile Gambhir kailhang mai lah a kavale lai lhon in Nupi naolhang bep khat in eihin houpi in, kenjong kavet leh kahetkhah sa toh akilou in hinlah hoitah a kahet tahlou phat chun phatah in kahoupi tapoi.

Suun lang ahung hitah phatchun Kanu toh Hotel khat ah Chadon din kalut lhon in ahi le ajo lang a kaki suhtopi nu chutoh kaga kisuto kha kit uvin ahi. Hichun aman jong eihin houpi kit tan, kalung atheh behseh jeh chun kenjong kisong lal pum in “Koi chu nahi hi tam, kageldoh thei tapoi” tin kadong in ahi le “Class-XI/XII simlai nagel doh lou hitam?” tin eihin dong’in hinlah imacha kageldoh deh poi. Hiche phat chun 2006 Christmas Welcome ni a Rebel Restaurant chu nageldoh lou hitam tin eihin dong kit in, chomkhatsetpi kaki ngaito vang in koi ahi kageldoh deh tapoi.

Hichun ken jong avel vel a doh ding chu nommo kasah in aban dongbe talou in thudang dang joh in kaki houlimpi tan ahi. Hitia kaki houlim lai lhon chun ahin kilhonpi chapang teni chu ama cha ahidan kahin hedoh tai. Chule ajipa chu sepai pang; gamchom a um ahidan jong eihin seipeh-e. Chutia kaki houlim lai lhon chun hiti hin ahin sei’e: Class-XII isim kum’u Christmas Welcome nikho chun kaloi phabep toh Bazar kai in kahung uvin ahile nilhah lang in Fast Food khat a Chicken Chowmein ne’ute kaki ti uvin hichun Rebel Restaurant chu kahin jon uvin ahileh kahung lut lut uchun kaloi hon “Na-dongmapa toh kilou tah khat Hotel sung lang ah kamu’e” ahin tiuvin kenjong hoitah a kavet leh Hotel sung a natong nahi chu kahin mudoh tai. Hinlah kanung-ngat nahi jeh in nang in vang nei-hepoi. Hiche nikho a Hotel Boy nahi kahin hetdoh chu kalung natdan aseije kahe pon, jaan khovah hiel in kamoh kaa jeng’e.

Ka-kaa a kichai hilou in Hotel Boy khattoh kingai kahidan chu kagel leh kajah acha lheh jeng in kaloi ho mai muding jeng jong gel theilou khop in phat sotpi kana um’e. Hichun achai chainan kaki gel in nang a kon gamlhat nathei ding tin iki muto na ji mun chu kapel tan, lampi dung a kahinmu jong leh kaki heimang ji tai.

Chutia nang a kon gamlhat ding kagel jing lai chun Sepai khat in eihin hel in, ken jong gel detdet louvin kana moh noppeh tan ahile phat sotlouvin Class-XII kachai chai chun kana kicheng lhon in tuhin Pathen lungset in cha-le-nao thum kanei lhon tai. Hiche teni hi aneojo teni ahin, Kumhei kon teng Bazar a mi atam behseh ji jeh a naoteni hi von themkhat beh kichohpeh hen tia kahin pui ahi.

Hitia ahinsei phat chun ken jong geldet det lou vin ‘Nao alenjo pa la hoija um ham?’ tin kagah dong pai in ahile amai ahung muollha jeng in imacha seinomlou bang in aum tan ahi. Hichun keijong kaki phalam in ‘O, naloipa la tua hi hoilai mun a posting lha ham?’ tin kagah dong kit in ahile amaiso chu ahoimo becheh tan, seibe ding jong kahe tapoi.

Chomkhat joupi hin kiphalam tah-in “Heo, sepai toh kana kichenkhah hi kakisih val jeng’e. ‘Service nei’ tia nopsat nading kahol ham kati le tuhin…” tin ahin seiyin aban imacha aseibe tapoi. Hiche aseichu kajahdoh phat in imacha kaseibe tapon, chomkhat jou in kahung kikhen tauve. Kanu vang chun aumchan chu avetda lheh jeng’in, mutsoi thimtah in imacha seilou in avemang hel jeng’e.

Hotel sung a kaumkah uchun Johnstone school kakai lai a school kom foot-path a school kikhen phat seh-a kana nga ji TG School a kai Nelly ahidan ka-hedoh tan, kipa ding la kamah in, lhaset ding jong kamah leo tan ahi. Nilhah in ka-Diary luiho chu kaholdoh in 2006 December 24 nikho a kipat a ka-thiljih hochu kave in ahile amanu ngaina a kahinkho man ho athah beh in kahin geldoh in, kapona lheh jeng’e.

Abang teng le hichenu hin lungsetna dihtah a eilungset lou hiding dan ahi tin kagel jin, Hotel Boy kapan ahetdoh jeh maimai a eina dalbol jeng chu kapona lheh-e. Hinlah abang kom teng le a-Chateni toh chun itobang hinkho amang diuvem ti kagel jin ka-khoto lheh kit ji’e. Ahinkho mandan hoitah a kadoh ahilou jeh chun kaseithei sun chu lung suhto maimai ahi tai.

Hoitah a kgelleh Nelly hinkho chu ajipa sepai ahijeh a ana-thisan khah ahi dem; ahilou leh munchom cheh a um ahijeh a kikhen kha ahilhon dem. Ahilou jong leh jithah anei den a a-Chate thum lah a aman khat akisin a, Nelly in ni akivet ahi dem! Lung a ahithei ding tampi kagel doh vang in ama kom’a gadong khel khel kahilou jeh chun adih pen kagel doh thei dehpoi. Hoitah in hehih jong leng hinkho nomtah a mang ahilou dan vang aumchan chun kicheh tah in atahlang in ahi.

Jinei-chanei ahitah jeh in aminlhing seidoh ding anompon, hijeh chun ngailutna neitah a kana kouna ji ‘Nelly’ hi ana mang tau hite. Nelly toh hin Class-XI kasimlai uva kana kihet doh lhon ahi in, hitichun kum-2 tobang kana kilungset lhon in ahi. Niseh leh school kikhen teng kaki muto ji lhon in, hinkho a kikhen lou din kana kitiem lhon’e. Tuchan hin BT Park dung kajotpa ji teng geldoh louding tincheng kagel doh jin, kalung ahel ji lheh-e.

Nelly toh kaki lungset lai lhon chun nikhat jeng jong kimuto lou in kahithei ji lhon poi. Kenla kalungset lheh in, aman jong ei-ngailu lheh-e. Hinlah thil neocha khat in kakikah lhon chu hatah in ana daltan ji.

Kaki houlim lhon teng ama kom’a Inn-san a um kahi kati jin, hinlah ka-umna a kapui nomlou jeh in ka-inn a hungding atiji teng kada chahkheh jin, lep nathei thei in kalep jin ahi. Ken kaumna a kapui nom jilou jeh chun hatah in alung phamo jin, ahin niseh a kimuto kahi lhon jeh chun kaseithem nah nah jin ahi.

Nelly chu aloite a-dongma houtoh akimuto ji uva, khatvei vei kom teng jong leh nehkhom ima abol jiuchu athangse jin, kei kom’a jong khatvei beh hung teiding asom ji. Ahin hichu thilpha ahipoi tin kasei jin, kaumna a puiding himhim kagel jipoi. Khatvei vei teng Rebel Restaurant ah kapui jin, hiche Hotel hi ka-inneipa a ahi tin Chow, Macroni, chule nehthei jatjat kaga la jin kaki pohsah jin ahi.

Kalungsetpen ka-dongmanu chu ka-umna a kapui nomlou ahi pon, kaumna ahetdoh ding joh kagel theilou jeh ahiji. Hijeh a chu thilchom chom a kalep ji ahi. Cell phone la kachoi lhonpon, khatvei vei Landline Phone a kaki houji lhon tilou in kihouna phat aum jipoi. Hijeh chun keini ding a aphat hoipen chu school kikhen teng Park lah dung a katouji lhon chu ahi mai’e.

Hitichun ol ol in phat ahung chal in, kaki lungset na lhon jong asang lheh tai. Nikhat jengjong kimuto louvin kaum theilhon pon, sun nilhum lhum a kaumkhom lhon jong le kachim dehji lhon poi.

Chuchan chan a Hinkho a ding’a kakitep nung lhon in Nelly chun ajeh imacha seilou in eina nungsun tan, ichan a anung thu kakhol vang in kana hedoh deh tapoi. Suhkhel khattou kanei khah ahidem tia kagel vang in la kageldoh pon, ipi jeh mong mong a hitia chu eibol jeng ham khonung changei in kahedoh poi.

Ei-khennom ahi tah jong leh khatvei beh “Kakhentai” tin ei-seipeh leh kalunggel jong agelje khat umnan te tin kagel jin, hinlah kihoumat nathei aumlou jeh chun imacha ahithei deh poi. Chutia einungsun mong mong ahi kahet phat in khatvei aloinu kadong in ahile “Sepai khattoh aki ngai tai” tin eina seipeh in hiphat chun kenjong thildang imacha kasei be tapoi. Hitichun Class-XII kachai jou, Graduation kabol lai chun Nelly ajinei tai ti kahin hedoh kittan, kapohnat lheh vang in ima kabol thei tapoi.

Kum phabeppi ache tah vang in kalungsetna jouse kapehsa ahijeh in kamil thei pon, kageldoh jing ji nalaiye. Lengdang sanding la kagel thei him him pon, hijeh chun nungah dang gellou in hinkho kahin mang tan ahi.

Lungset lheh jong leng jinei-chanei ahitah jeh in Nelly chu anungthu ima kakhol tapon, kalungsetna chu kalungthim a bou kana kikoi ji tai. Kadong man in ka-Diary ah kalunggel hochu kjihlut jin, hiti chun kei le kei kaki lhamon ham ham ji tan ahi.

Tuhin phat chesa ho kanunggel teng Mi-bang’in Officer lientah hijou hih jong leng Pathen in kakivah nakham natoh neokhat eipe tan, kanu le kapa kipah tah in kavah thei tan ahi. Kum a vetdin jineipha kahi tan, service neokhat jong ka-join ahitah phat chun Kanu in khatvei vei teng jinei ding thu ahin seijin, hinlah Nelly kageldoh teng jinei ding mong mong kagel thei jipoi.

Hitobang dinmun a kaum laitah a Nelly toh Imphal tuolpi a kaga kisuhto khah chu kagelleh ka-mang toh abang jeng in, Inn kalhun a ka-Diary luiho kaphohdoh a kathah vetchun lunghel nan kadim lhajeng in ahi.

Phat chesa ho chula koukit thei ahi tapon, hinlah kagel jiteng naicha bang in kagel ji nalai’e. Kalungset pen ahijeh chun Kanutoh Bazar a kaki suhto ni uva aumchan chu kagel in, itobang hinkho aman ahidem kagelmo lheh jeng’e.

Hiche kikah lah ahin Nikho phabep ahung che kit tan, hetmanlou in Christmas welcome nikho ana lhungman kittan ahi. Hijeh chun loite ho message/wish khattou aum dem tin facebook kagah Log-in ahileh inbox ah: “Heo, kum hitih chan kana nungsun najeh seidoh louva kaum chu neina gelkhel hihbeh in ong… Ken nang kalungset lou nahipoi; kaloihon Hotel Boy toh kingainu tia totna a eina nei ule kajachat man’a kana nungsub khah ahi. Kalungset lou in ana gel hih in… chapang lungmol kana hi jeh ahibouve. Tun kei hiti tajong leng Pathen phatthei boh nachang in, Society sung a mi hetthei tah khat nahi tai. Hiche sang a sangjo a mihet nahung hiding jong kaki nepna ahi nalaiye. Kachung a nalhaset naho ngaidam kahin thum’e. Pathen in nahin mapui jing tahen” tin ana kisun’e.

Hiche message kasim chai chai chun ‘Reply’ bolding kagah gon ahile kabol thei tapon, kenjong ‘Profile’ beh gahvet ding kati kit le Account chu ‘Deactivate’ ana kibol tan, kave thei tapoi. Bolbe ding dang kahet lou phat in ka-facebook account ah: “Rebel a ana umkhalou hileng tunia hi kalungsetpen nutoh hinkho nomtah a kimangkhom tading’a…” tin Fast Food a nna katoh lai a ka-genthei nathu ho chu phabep pi kajih in ka-status chu ‘Update’ kagah bol in ahi le ‘Like’ le ‘Comment’ tampi ahung umpai in, kavet leh comment hinbol atamjo chu nungah jeng ana hi’e. Hiphat chun kenjong comment hochu khat khat in ‘Like’ kabol in, ‘Reply’ jong kagah bol paipai tai.***