Lungsiet um Delhi hinkhuo

“Hei! Nangnu chu, Matric a first a kahung a jong nakitepna nasuh bulhit lou; tua la hoiham garineo R-15” tin Helien in Tingbem chu O’sang thim tah in ahin hou’e.  Hichun Tingbem in zong “itih a kanasei hitei” tin  kihet mosah thim tah in ahin ledoh‘e.

Hitia akiniel sat lah lah hon laitah chun insung akon in an-ne ding in anu in ahin kou lhontai. Hichie nikhuo a hi Helien Class-xii a first a ahung jieh a anu in ahsa atha peh ahi.

Helien leh Tingbem hi aumkhom lhon pou pou leh akina jieng lhon in, del jong akidel ji lhon’e. Ahin aumkhom lhon lou jong leh akingai lheh ji lhon’e. Aneo apat golcha bang’a hung kivop ahilhon jeh in kija tona alhasam in, ucha hina mudoh thei in aum him him ji lhon poi. Tingbem in Helien chu angailu’n, Helien in jong Tingbem chu alunggel jouse seinan amang kitji’e.

Hapta nivel jouvin Helien jong Delhi a aban simjom dia kigong ahi in, akigot na bang in anikho jong ahung lhung pai ngal tai. Matric apat a first class a hung jing ahi jeh in a-insung miten akineppi na asang in; insung genthei te hizong leu Delhi a sum le pai a genthei sahlou din akigel uve. Helien in zong insung hahsat dan ahethiem in sum le pai vadjeh in a-insung mite alunggim sah khah poi. Delhi a gachie a jatdang namdang ho lah a thiemzil ding agel leh atha anom in Officer lientah khat hung hitei din kigotna aneije.

Jingkah matah in aki gong uvin Imphal ahin jon taove. Helien leh Tingbem bus a ahung toukhom lhon in phai ahung lhun chan’u kihoulou in aum lhon’e. A-umkhom pou pou leh kina jieng teni chu hichie ni chun nguichet in bus ah pung-3 vel ahung toukhom lhon’e. Parking ahung lhun uva bus a kuon ahung kumlhah lhah uvin Tingbem in “Hichiepa jong hi lekha sim’a kisol a anjo leh numei joh hinsim vehta…. Delhi numei ho phatmo thei thei toh” tin anu leh Helien jah din ahung paodoh’e.

Helien in jong khogai louvin “Nang pichu naphat lheh a’chula; kahung kile kah in ana kijinei doh tang …’ tin ahin le donbut pai in ahile anu in “Najah lhon chalou hichu, phai sung kisen a naki nah lhon” ahin ti’e.

Hichun Helien in jong “Hichie Tingkhobem nati nu’u hi hila, mi chekon a hoilang lang thu ahin seidoh ham?” tin ahung phun kit nalaije. Hitichun taxi khat akilah uvin Blue Hill parking lam ajon taove. Blue Hill parking alhun lhun un Helien in ticket akilah in, tingbem’in Helien thil ima avettoh peh’e. Bus kipat doh nading phat avad jep nahlai jeh in cha adon uvin thu nuom nuom in aki houlim uve.

Chomkhat jouvin bus kipat doh nading phat ahung nai tan Helien in “Tingkhobem, ka-bag nin pe’o, pung lhing ding ahitai” tia Tingbem agah houpi leh Tingbem in ahin houpi vah poi. Avel in O’sang thimtah in aseikit in avet leh Tingbem in tollam a akun a amitlhi thonggo bang’a analuon chu amu’n; alung akidang in, amaiso akikhiel jieng’e. Chomkhatset pi seiding helouvin aka den tai.

Chutia aham masa ding pen umlouva aum lhon jouvin Tingbem in a-bag akuon thangnang mofler khat ahin ladoh in oltah in “Boi, tuni apat phat chomkhat kimuto louding ihi tan, hichie hi kei mel a nachin jing dia kapeh nahi” tin Helien chu ahin pe pai’e. Helien in zong chiepet tah chun Tingbem in akhuon ji lai’a “mikhat special gift a pehding kati ahi” tia ana seiji chu ahin geldoh in, ama ding ahilam anagel phahlou jeh in kidang asa lheh’e. Ajehchu special gift ding atiji jeh a Tingbem dia special person a-dongmapa ham khat pehding ati hinte tia ana gelji ahi.

Helien in oltah a anung gel leh a-unu gollhang hon ahung helji a khatcha noppeh louva aumji chu ageldoh in; nang in service namu tieng le bou thupi tah a kajinei ding ahi ana tiji chu ahin geldoh’e.

Anu injong “Boi, na–unu in hinkhonuom manglou hiel’a nangding ngaito na a asun-ajan a puon akhuon a genthei athoh hi sumil hihta ong” tin availhah tai. Helien jong thu seiji hethei louvin bus chung a akaldoh tai.

Helien bus a atoudoh chun angaitah Anu leh Tingbem khankhuo ding agel in; abang leh achesa phat ho ageldoh jin lung ngui tah in aum’e. Tingbem in special gift apeh a aman la ima a alethuh joulou ho zong agel in alung in aki-oimo lheh jieng’e. Alangkhat ah, Delhi khopi lhun’a hoitah a lekha simding agel kit jileh atha anuom in, mikhat vang kahung hitei ding ahi tin akigel’e.

Helien achietan, Tingbem leh anu zong inlam jon in akile kit lhon tai. Hichie nikhuo chu Tingbem leh anu din jong lunggel alamdang lheh’e. Ahin Helien in Officer lientah khat ahin mu a inchen genthei naho sumil a nuomtah a chenkhom ding agel ji lhon tieng kipanan adim kitji lhon’e.

Phat achie jing toh kilhon’in Helien zong athiemjil na a amachal zing in Second Year chan chaithei din aumtai. Ahin, geltoh banglou tah in Helien chun kumni sung chu hinkhuo ana mangkha tai. Nule pa chuleh khosung mi muphah louna gam’a hinkhonuom man in mi umchan ana tho khatan ahi. Ama ding in nilhah lekhasim sang in bar leh restaurant dung a hinkhonuom man ding joh apoimo lheh’e. Day-time leh vang attendance a regular lou khoh ahijeh in khatvei vei outing achieji tilouvin college achie jing’e.

Gamchuom a umho ding a akhoh pen khat chu nulepa chuleh sopi chengtoh gamla tah a um chance lah a hinkhonuom man ding hi ahin, Helien  chung a jong hitobang hinkhuo chu ana lhung kha ahi. Ipi bolzong leh avesui ding umlou ahijeh in abol jouse apha dan in agel jitai.

Second Year achaiya Third Year asim ding kuon in khat vei in lam a ahung potdoh in lhani tobang nuomtah in aleng le’e. Helien in inlam ahung chun Delhi a a-umchan ho koima kom a aseidoh puon, chuleh a-grade hoijilou dan ho zong a-imchah jing’e.

Delhi a kumni jen hung um ahi phat in avouso ahoi in, nungah ho mit ala’n ama din kivoppi ding loile pai avat poi. Numei toh kivop jidan thiemsel a hung potdoh ahi jeh in chomlou kah in aki voppi nungah ho chun ahin ngai theilheh taove.

Helien in chutia hinkhuo aman chu anop lheh vang in avat khat um dan in agel jing in loi le guol keo hilouva Delhi le jodkah a kingai pi din Niengbuoi chu ahin kilhen tai. Niengboui zong nungah melhoi tah ahi in, akom’a lungset thimthu hinlal tampi ho lah a Delhi a thiemjil Helien chu adeilhen lheh’e. Delhi achie masang apat lekhalam abolthei dan  chuleh gollhang kingolsah lou ahidan ana hetsa ahijeh in angaisang chuom lheh’e.

Lhani lhing ding ahi tan, Helien zong suty akichai tah ding jeh in a-dongmanu Niengbuoi ahin lhadoh in Delhi lam jod’a a-lekhasim ban gasim jom kit tadin aki gong kittai. Niengbuoi in zong Helien in ‘service kahin mu muleh kahung kipui pai ding nahi tai’ tia availhah nachu ageldoh zing in alung thim ah alungsiet Helien ngailheh zong leh aki lhamon ji’e.

Helien dam’in Delhi tuolpi availhung kittan; abuolkhompi zing aloi ho chun kipah tah in ana lamtuo uvin, Niengbuoi geldoh phalou leovin hinkhuo amang pan kittai.

Ahin hitobang hinkhuo nom chu a-itih a ding ana hi tapoi. Delhi alelhun lhakhat lhinglou lai in Niengbuoi in phone ahin bol in “lhakhat kalhing tai” tin ahin seipeh’e.

Hichie thu ajah chun  Helien aum nalam helou leovin genthei tah in hinkhuo amang tai. Ahin koima kom’a seidoh louvin alungthim a aselguh jing’e. Helien hinkhoman kikhel dan chu aloihon lamdang asaovin, hinlah ipi jeh ahi akhuoldoh jou pouve.

Alangkhat ah Niengbuoi in lhani Alhin chan’a Helien in ima ahinsei tahlou jeh in aki go in Helien kom’a din Delhi ajon tai. Delhi alhun in Helien umna aholdoh in ajonlut jiengtai.

Niengbuoi in Delhi chan a ahin dellut jieng phat in imjou talouvin Helien in jong aloi akihet gilpi deh dehho kom’a thil umdan chu aseidoh tai. Athu ja abang loi chun “numei mimo ahi, eiho buon hitia akum akum’a hung ki-um a nao kivoplou” tin  Niengbuoi chu a-oimo uve. Abang vang chun thinglhang lam’a contraception aki hetphahlou dan ahethiem uvin Niengbuoi chu akhuoto thei lheh uve.

Upai dang nei talou Helien in jachat na jouse atuolkoi in thu umdan ho jouse chu a-itih a alunggel ngap na a anei Tingbem kom a chun ahin seidoh in; Niengbuoi ji dia akipui tahding zong ahin seipeh tai.

Ahin Tingbem in Helien lunggel chu aphatsah peh tapoi. Ajehchu akinepna bang a Helien imacha hilou a aji acha toh inlam ahin jod ding chu agel theilou ahi. Hichie sangchun Tingbem in ama phatsah dan tah in Helien in nao asuhlhah din asei tai. Nao suhlhah ding adalheh vang in Tingbem in asei tei tei in, “Min abol ngailou nahisah ham? Servive namu tieng naki chen lhon a nom tah a hinkhuo naman lhon ding hichu’me” tin Helien leh Niengbuoi chu alhem lhem ji’e.

Nao suhlhah ding da jeh a Delhi chan a hahsa tah a gavailhung Niengbuoi din athoh ahahsa lheh’e. Hijong leh alou theilou ahung hitah phat in Helien leh Niengbuoi in jong nao lhathum (three months) alhin masang a ladoh din ahung kigellha lhon tai. Amani ahung nop lhon phat in Tingbem in puon-khuon a genthei tah a akholdoh sum anei kham kham ahin thot in mi hetlou namun khat a naocha kigong til chu aladoh lhon tai.

Helien alunggel genthei lheh jong leh pasal lung akeng in a-thiemjilna aban jom ham ham’e. Niengbuoi zong inlam kile ding  a-gelthei tahlou jeh in  call centre khat a na atong in aki hinso nathei ding lampi akihol tai. Chuleh inlam a a-insung mite kom a jong ajinei hilouva insung hahsat jeh a Delhi a company natong a che dan in akisei tai.

Phat chomkhat jouvin Tingbem ahung dammo tan, Helien toh kimutuo manlouvin athi pai tai. Helien in zong aham ham in course ahin chaiyin, thil umdan ho anung gel’a Tingbem dammo manlou tobang a ahinkhuo abei paichu avetleh suhkhel khat akuon a aban ban’a kisukhiel kha ahi tadem tin aki oimo lheh’e.

Hijehchun suhkhiel ni akuon thum alhinlou nading tin Niengbuoi chu ji in aki pui in inlam ah jachat najouse nu-se in ahung pot tai. Inlam ahung lhun in insung a mipa khat dinmun a ding ahi tah jeh in tohthei thei atong in a-puhsui tai.

Thil umdan imacha hephalou achunnu ngaitah chun tu mel munuom in alha leng leng ji’e. Khatvei kuom kuom leh alungset lheh vang in amounu Niengbuoi chung a alungkim jipon, ahin chingthei tah in alung kimlou naho kihetsah louvin amounu chu ngailud na neitah in chaneilou hijong leh ajen jen ji’e…….

(*Laijon Digest, March 2013)