Mitphet kahlou’a kachan Lungsiet dihtah

Class-X simding kahi jeh chun inn-san kakilah in kaloikhat toh kana umkhom lhon’e. Kaumna veng a chu TV nei khat bou ahijeh in suty ni ho leh TV ve in kana che jiuve. Janleh thingnoimi hon simlai ho apotdoh sahji lou jeh un che nading jouse khovah pet in kaki chedoh jitai.

Nikhat nilhah lam school kai kikhen a TV kavet pettah un kitchen lam a kuong le bel ahung ging lheng lhung in ‘koipen ahi tadeh’aw’ tin kalung aboilheh’e. Mi gahdoh jeng ding chula kaki phalam in koima kadong tapoi. Inn kalhun in kaloipa kadoh leh “Koi dang hiding ham… a mithangnu’u chu hinahta” tin ei donbut’e. “Koi nati, a mithangnu nati chu…” tia kadoh kit leh “Kate, TV neite chanu chu la aw” ahin ti’e.

Hichun kenjong koi ahi kahet loulai vang chun “O, numei gunda hitei ding hichu o… koi pen chu ahi tadem” tin kalung sa-ih lheh’e. Hichu kaloipan ahethem in “Itidan a Lycia nahet lou ham, school khat a kikai khom a…” ahin tipai’e. Hitia ahin seichun kalung athehsah be jo’e. Hinlah aban ima kaseibe tapoi.

Nikhat ma TV ve a kacheu le TV kavetna uva chun nungah melhoi tah khat kahin mudoh in, alim-amel chu kalunglai a sihtwi nu abang jeng’e. Kei lunglai akoibang chun mitin lunglai jong koi tei inte tin kagel’e. Hinlah mithah kahi nahlai jeh chun koima kom a ka nungah mu nu chu kaseidoh pai pon, kalungthim a kaching jing joi.

Chubang a melhoi kasah nu chun alung ati louleh TV ve a hung chapang ho chu pohlah lah in ahin pehthang jeng jin, chonnem lheh inte tia kagel natoh aki tohmo lheh’e. Khatvei vei teng leh ‘alim toh achonna akilommo tave…’ tin kagel ji. Phat ahung chal in amin jong Lycia kitinu chu ahidan kahin hedoh in kitchen lang a agilkel pet a bu-me aum louleh akitom jeng ji leh school a ka junior class-ix simlai ahidan jong kahin hetdoh be tai.

Ahindan ho jouse kahet jeng nung jeng in jong ol ol in kalungset na ana khang in apilhing hitam tin kana kigel tai. Koima kom a kaseidoh loulai vang in Lycia kei a ding khattou ahi tadem tin kaki gel ji. Tom-boy khat lungset chan ding kiti chu kamang a jong kana gel phahlou ahikit’e. Mi kamthip, mi khalah lou, mi jahchase kahi in kei le kei jong kaki detmah’e.

Chutia guhthim a hinkho genthei tah a kaman zouchun nikhat kalunggel ho jouse kaloipa kom a kaseitan ahileh aman jong katot mai mai dan in agel nalaije. Hoitah a kasei phat chun aman jong ahin hethem tan hinlah hahsa asah lheh’e. “Lycia hindan kahet sohkei ahijeh in kei vang kati aja bouve” ati.

Kaloipan Lycia kom a ima aseingam louding kahet phat in kei jong pasal tin eima tah kipat ding kagel tai. Hinlah niseh a Lycia te inn kipha jilou ahijeh in chance vet ahahsa lheh’e. Chance themkhat tou kamu jong leh kalunggel ho kasei ngam kit ji pon, humpi mu kabang joji tai. Kamasang tah a ahel a hung gollhang ho mibol a abol jilou dan kagel jiteng kalung aneo dehset ji. Hichan a lunggel hahsa kathoh vang chun Lycia chung a kaki nepna adai deh poi. Ajehchu gollhang dang ho chu Tom-boy action mai mai ahung vetji dan uva kagel ahi.

Tulai tobang a alen-aneo in phone kichoi hileh ana nomjep nante. Kei jong kamcheng a ima kaseidoh lou ding kaki het phat in letter khat kasun in kinem tah in chapang khat ka pehsah tai. Hinlah kaki nepna toh bang louvin nikhat TV kavet pettah un ahin ladoh in insung a umjouse masang achun ei jumso del’e. Keijong vet nading kahet lou man in mai san dehduh in kamoh kat den tai. Hitia eibol nachu apa in pha asah pon, Lycia chu aphoh in ahileh khatnu la akidoi naisai poi. Kaseibe leh kick nedin warning eibol nalaije.

Hichan a ei bolset jeng vang chun lunghan naleh thangtom nan kasang thei poi. Khatvei vei teng kagel leh kajah acha jin, kalha ase ji. Hichu kaloipan ahethem in ei lhem lhem ji. Aman jong eina seipehsa ahi jeh in ima seibe ding ahedeh poi. Chutia Lycia in eibol na jadoh kaloi dang hochun ei-pohnat peh lheh uve. Abang in ‘bolchah ding ahi’ ati jiuvin Lycia bolset ding chu kadetthei him him poi. Abang vang chun ‘adu aneh ahi’ eiti jiuve.

Hiche ni a kipat chun Lycia te inn a TV vet kanga in, kaloi ho jouse TV ve a ache jiteng kachang in lung-ngui tah in kaum jitai. TV umtil ahijeh in TV vet aki thanop jidan chu atepi bei ahi. Kaloi ei-khoto deh deh hochun khatvei vei Lycia kom a eina houlim peh jiuvin kei neh sang a khohjo jo ahin nehlo ji uve.

Kalungset na la adai deh pon, chutia kaki lhaset sah leh ima molphou louding ahi tin kalunggel a ajat jat kagel ji. Achainan kaloi ho koima Lycia kom a houlim ngam aum tahlou jehchun kei mong mong kaki patdoh angai kit tai.

Hichun jachat jouse kahin nuse in TV ve in kahung pan kittai. Lycia in la ei houji pon, aki donbut le thingkhotong neh ding ahi jeng ji jeh in ima kasei jipoi. Chapang ho joh tot theilou sa sa in katot jin, anu le apa jong kahoupha lheh ji. Hitichun meivah ahung pou pou leh TV vedin kaleng pai jitai. Tija tah a kitou ji ahijeh in TV mai a katou ji vang in ipi film kilha ahi lam jong kana hedoh jipoi.

Chutia matah tah a katou pan ji a anu’nung pen a kapotdoh jing jeh chun khatvei vei ‘mangpha’ hung kitiji holah achun kahung jaokha jitai. Lunghan najong daijep jep hitan tin, sol ding dang aumlou beh teng eihin sol jap ji. Gah gel ding a asoh a kipang ji ahivang in alunglam hol kahina chun eiha soljep nalaileh katiji nalaije. Ama gache a gabol jengding khat jongchu mi solthei ahi leh soljeng ji mi ahi chu kei mission lolhin nadin apha lheh’e.

Alangkhat a nehthei adu ho jong kachoi jap jin, thinglhang apat anme adu kahin poh khah leh anu chu kagah peji. Ol ol in kivop doh tei ding kangaito in, phat chelam helouvin machal kakisah lheh ji. Atahbeh chun phat jong ahung chal in Lycia te toh kahung kisa thei lheh taove.

Mi jenngai kahi ahet jeh uchun anaote tuition lahpeh din eisei un, keijong kalungthim a ipute kiki thopi pan tading katiji. Tuition a anaote kahil jiteng Lycia cha-om kahindon khajap jap jin tui kasah theilheh ji’e. Kihet them tona akhan jep jep toh kilhon in kin umlou pet kisen leh kaga kholai leng jin Lycia toh jong golcha kingaitah bang in kahung umdoh lhon tai.

Khatvei vei teng ei bol naho ahin phapoh jin, aphalam tah in kadonbut ji. Lycia kasuh lunghan kit ding chu kagel theilou jeh in aguh in lungset lheh jong leng kaloi khat mai mai dan in kabol in akom a lungset nathu him him in kakam keh tapoi. Tom-boy hon numei sang a pasal aki voppi nomjoh dan kagel jin ama dia best friend hiding kagel sang pen’e.

Keidin jong ama kalunggel ngapna ahitan, ama dinjong alunggel seina kahi tai. Golcha kingaitah bang a hinkho kahin man lhon tahjeh chun kakikah lhon a thu ki-im kiti aum tapon, kipana hihen lhaset na hijong leh kaki share to jing lhon tai. Hinlah amadia best friend mai mai kahi vang in keidin best friend kalval ahi nalaije. Hichu aman jong hethem lheh leh kati ji.

Nikhat chu vai nung ahitan, keini seh seh kaum lhon’e. Ken kachang in common room a TV kave in aman insung a bolthei thei akibol’e. Chomkhat jouvin a-room sung apat eihin kouvin von thah akichoh hochu kilom hinam ka vetpeh din aseije. Vonthah ahin kivon doh ji hochu akiloppi jong aum in, akiloppi lou tah tah jong aum’e. Hinlah keikom a eihin doh jouse chu excellent ahijing in ama jong akipah lheh ji.

Achai nan ‘kavon kikhel tang’e, khulang ve in’ eitin ken jong kanung kangad’e. Kanung kangad ahijeh chun mit kising khel hih jong leh akhohpoi tin ka masang a almirah a von kikoi hochu kagah ve le le’e. Hichun almirah a langva (mirror) kito achun Lycia von kikhel petchu kamudoh tai. Ama jong dressing table a life-size mirror mai a ding ahijeh chun ken ama kamu bang chun aman jong eina mupai ngal in langva achun chomkhat pi kaki veto lhon’e. Kingamsum tah a anung eingad sah a von kikhel ahijeh chun kiphatlam na ana umpoi. Langva a lhengpet a kamu a aman jong kamu ahi ahet tah jehchun hetman lou kah in lunggel ana kikhel mantai.

A-vonthah ho kilom nam tia eivetsah ji a kenjong a lengkou lah ho kagah heitoh pehji; chuleh aning-akah kavet le ji chun room sung a kei ni bou um kahi lhonjeh in golcha hina ana kihaimil deh deh ji ahitai. Thisan pucheh aki hina chu langva a kaki vetto lhonchun…!

Chomkhat jouvin kahung potdoh in bolding hetlou man’in TV channel suhkhel toukhel katho’e. Hiche pettah lunggel chu alamdang lheh’e. Ipi i-atileh kigel detdet louva chuchan kaphah lhon ham ti kagel in tijatnan kadimset in ka-ulchim in eivuh’e. Abang leh golcha/sopi himan a mi umlou na a kingamsum behseh jong hin ahilou lam a eipui thei ahi tin kagelji. Class-X simding bep kahi nalaijin, kitim je jong kithiem loulai ana hikha hinte.

Chutia dinje touje hetheilou khop a kaum laichun Lycia jong ol in jahcha thimtah in ahung pot in hampoh louvin touna sao achun atouve. TV mai achun aham masa jo ding umlouvin katou lhon in maiso a kipana maiso him him aum thei tapoi.

Chomkhat jouvin Lycia in ‘twi dap nadon ding ham’ eihin ti in, ken jong pha tante kati. Hiche kalval chun ima kaseibe kit lhon tapoi. Chutia thipbeh buh a kaum lhon laitah chun meivah ahung mit in, keijong chephei tadin kahung kipatdoh tai.

Kahung dindoh a ‘che tang’e’ kahinti chun Lycia in ‘nache got hita ong?’ tin eihin dong in, amaiso kavet leh ahoi beh tapoi. Hoitah a kagel leh eisoldoh nomlou lai hidin kagel in ken jong Lycia thukhat sei inge katin “Nei lungset theilou mong mong ham, kenvang kalungset jing nalaije” tin kadong’e. Hiche thudoh kanei nei chun mitlhi pum in lunghang tah in eihin ven “ipi ding a tua hichu neidoh ham” tin athakhop khop in eihin chum jeng’in kahaihu abing dehchet’e. Numei hijong leh pasal tha keng ahi jeh in tha ding eigot ngap hitam kati man ahi. Hichun ken jong alunggel ding kahethiem in ‘kahet khel ahi lunghang hih in’ tin kakoi jin a chalpang khatvei ka kiss leh aman jong alhi-anap pumchun lung nachim tah in eihin koije.

Seiding helou sa san chomkhat set pi katoukhom lhon in nilhah lam ahung hitan kei jong ka umna inn kajon tai. Inn kalhun chun kakigel in kei le kei kaki detmah lheh’e. Abang leh kaki oimo jin, abang teng kahung mechob kitji. Hicheni thil umdan jouse chu kagel gel le tijadnan kadim lhajeng’e.

Kasunggel jep nahlai leh eimite kingamsum man a kivondan a numei-pasal kijatona alhahsam kagel doh in golcha kingai louva kicheng; sopi kicheng louva chanei tiho thu akijah jing kahin geldoh’e. Nipi lai dehdeh leh pasal hon numei masang jeng a jong sangkhol ladoh jeng, numei ho jong doh tittet leova ikivon jeng jiu hi eiho society dinmun in aphal loulai dan ahi ti jong kahin geldoh’e. Lycia chun golcha ki-frank tah kahi lhon jeh a avonthah ho chu akiloppi hinam ti vedia eihin kou ahi in, lunggel se him him ana gel ponte. Hinlah tulai numei vonthah ho chu standard theilheh ahijeh in keini bou kaumna lhon a kavet pehchu thisan pu ana kihi ahi. Vet mai mai hilouva sangkhol a pahcha umho kagah thampeh ji jong chun plus-minus ana chekhel sah man dan ahi. Hichangei a lunggel chu lungthim a kana kipoh cheh lhon jong anahi.

Kum sotthim pi achetan, tuhin gal a kolte gam kaumna apat kahingel jiteng ajat jat kalung in ahung kilang ji. Keitoh kaumchan lhon chu atho jing dem tia kagel jiteng kalung athoi lheh jin, nungah kitah tah hidia kagel jiteng levang kipanan kadim kitji. Kaki khaokhisa nuchu akhao ana kilhem hih nante tia kagel kom jong aumda jipoi

Thilse tampi kalung a akilan jeng vang in mitphat kahlouva kalungset pen nu lungset na dihtah kachan jehchun vangpha kakisah ji thouve. Pathen thutep hihen michom toh hung kicheng kha le vang aji in kei lungset na bang a ahin lungset ding hinam ti kagel leh kadip adap’e. Keidin kikhen lhon jongleng aboi beh pon, numei aji in mijisa ahi tia ahin thet a a-genthei ding chu kagel theilou ding ahi. Ahin imajouse Pathen khut a kingam ahijeh in ijemtia kei toh kicheng louva kaum khah lhon leh aji dingpa chu milungset theitah ana hinante.

(*Laijon Digest, July 2013)