Nanaonu khankhuo ding hin-gel’o

Laijon Digest a fiction kana jih nahi ahungsot thimtan, kajihdoh jong phachompi ahitai. Khatvei veileh “Ipi phachom lou kingadoh tahen” tin kageljin abangkom teng le vang “En akijih louleh kuon ajih ding ham!” tin article jihding hi kakin dan in kahin kigel kitji. Alangkhat ah asimho lunggel ding jong kagah ngaito jin ajatjat kagel dohji. LD a ka-article jih ho jal a Laijon ho akon pachatna kamu tampi aum tan, thanom tah a ana simjing ho jouse chung’ah kakipana seijouhuoi ahipoi. Chuleh LD a fiction hung kiso ji ho chung’a ana lungphamo tampi jong aumding katahsan in amaho chung’a jong kakipana alen’e. Mihem jouse lunggel kibanglou ahi in, adei aumleh adeilou jong umtei ding ahichu hetsa ahi.

Ahin aphat-aphatlou lang chu thilchom in kakoiyin article hohi Laijon khatle ni beh in aphatchompi ding joh thupi in kagel’e. Hijeh hin ka-thusim jih ho jeh-a musiet kachan ding jong imachan kagel poi. Ka-article simjing Laijon 100 lah a khatseh seh in aphatchompi jong leh ‘aman aletai’ tia kagel ahi. Ipi hileh tuchung hin masang a toh kibang jeplou in LD a article kana jihho chung a kathilto khat i-magazine’u ngailu a simjing Laijon ho din kahin seidoh nom’in thanom tah in ipi kiseina ahi gelpum in ana simcheh ute.

Esther toh kahung kihet nahi lhakeh bep ahinalaiyin hinlah phatseh in kaki houmat jing lhon’e. Graduation bollai nungah melhoitah ahi in, phai tuolpi Checkon a cheng ahi. Esther-pa hi Pathen lhacha-natong Pastor ahi in, Esther hi chanu changkhat a anei akisuonpi ma ma jeng chu ahi. Pa-Cha ahilhon vang in guolcha tobang in akivopji lhon in aki ngailu lhehjeng lhon’e.

Esther-pa hi Pastor ahitoh kilhon in Lhagao lam a sinthei umtah ahin Houbung sung leh Vengsung a kisuonpi umtah chu ahi. Ama akitah bang hin a-innsung mite jong atahsan in koima thilse toh avetbeh poi. Esther jong apa bang’a Houbung sung’a manchah theitah nungah feltah chu ahin mitin in kihilna a anei Pa-Cha teni chu ahilhon’e.

Esther hin LD a ka-article jih ho anasimdoh a kuon’a ka-number ahin holdoh a hiche a kuon’a chu hung kihedoh kahilhon’e. Phone eihinbol masatpen nichun koi ahi ahung kisei in khatvei kimuto din eihin tiem in kahetkhah ahilou jehchun kalung ana boilheh-e. Ajeh ima kahetlou vang chun thukhohtah bang’a ahinsei jehchun a-inn uva kagache in kana kimupi’n ahi. Kaki muto masatpen ni lhon’a asei thupipen chu a-innsung miten Evangelist khattoh kichensah ding agot’u ama anoplou chu ahi. Thuning-thukah kahepon, hinlah Evangelist khattoh Hou-Dantheng a kicheng theidia aum chu kakipapi in aphalam tah in kaseipeh-e. Ahin ken aphalam tah a kaseichu ama anom hihbeh jeng’e. Hichun kenjong “Hepa la Pathen natong ahi in, Pathen lhacha ho toh kichen ding ipidia nada ham?” tia kadoh leh alungset theilou, dei jong adeilou ahidan ahin seiye.

Hichun kenjong ama chu “Mipha hilou ham; Ole amel hoilou ham?” tia kadoh kit leh “Mipha ahi in, ameljong ahoimo poi” tin eihin donbut kit-e. Esther kom’a chun kaseibe kit-in “Esther, tun lungset thei hihjong le chun ol’a nahin lungset thou thou ding ahinai; Henu le Hepa thusei chu ngai phot lechun khonung a ding chu Pathen in hin-kigon tante. Lungset kitihi kichen masang a bou thupi ahi in, ikichen jou apat kihetthemto bou thupi ahitai. Kilungset tah a kicheng ho akichen jou teng ule akingailu pai pai dehpon, kidei-kingai lou a kicheng hojong akihetthem pou uleh khonung in kingailu tah in ahung chengkhom ji bou uve…” katipeh-e. Hinlah hitia kaseichu ajahnom hihbeh jeng’e. Amella ahoimo pon, mipha la ahikit in, akhuti leh chutobang Pathen natong khat adeilou chu thilkhat vang um hitei inte tin kagel tai. Chuleh athu umdan hetohlou a kadei dei kasei jong chu kahung ki-oimo in dohchet masat ding kahin gel jo tan ahi.

Hoitah a kangaito jou’in “Marriage itih hitam?” tia kadoh le “Lhathah kichai lam khu ahitai” tin eihin donbut in hiche aseijou apat chun amaiso ahung kikhel in kaki phalam lheh jeng’e. Chomkhat jou hin “Heu, dongma khat kaneiyin kahung kilungset na lhon jong ahung sottan, michom toh kicheng jong leng ama hi sumil tapong’e” tin ahin seiye. Seiding hevah lou in chomkhat kaum in ahileh “Henu le Hepa kom’a seidoh ding la kaki phalam in ipi kati mong mong ding hitam?” tin ahin seibe kit-e. Anu le apa hin Evangelist pa toh kicheng dia asei lhon masang a Esther hi kilungsetpi anei-aneilou anadoh masat lhon ahin, chapang cha ahi nahlai jeh a jahcha a ana seidoh lou ahi. Chuleh jineipha a kigelloulai ahijeh-a anu le apa in jineiding thu hinsei inte ti ana gelphah lou jong ahi.

Hiche ahinseidoh chun anule apa hin ipi ding a jineipha jong hilou lai chapang chu jineisah ding agot lhon ahidem tin kalung in kagel’e. Hinlah college kaithei chu kum-18 beh vang hiding ahitan ajineimo behseh vang ahitapoi tin jong kagel kitji. Ahin anule apa toh golcha bang’a kivop thei ngal’a dongma thu a akijachat thei’u vang chu kadetmo lheh jeng’e.

Chomkhatsetpi kakigel kit-in Esther kom’a chun “Na-dongmapa toh nakikah achun ken naki thopi nang’a” tin kagah sei in ahileh kipah tah in “Heu, hiche ding a chu kahinkou nahi” tin eihin donbut-e. Hiche jouchun “Heu, amakom’a ipiti nasei ding ham?” tin eihin dong in ken jong nakikhen nathei lhon ahipouleh seithei thei in kisei tante tin kadonbut tai. Hiche kasei chu adiplai tieng a kisun abang jah jengtan “Hichu seiding a kakou nahipoi; Ka-u Liencha hi itih hijong leh sumil tapong’e” tin ahung kapjah jeng tai. Liencha ahin minphah chun kaloi Liencha kiti khat jong um ahijeh in kahung kindoh in hiche hi aki bolkhel le boiding ahitai tin kagel tai. Hichun ol in kalhem in “Esther, ipiding’a kap nahim, nang kithopi di’a hung kahi” tin kalhamon’e.

Akalai ahai’a themkhat ahung lungnop dom phat chun “Ether, nakilungset pi hi koi Liencha ham, koi mi ham…” tin kadong in ahile kaneo apat kahin kivoppi kaloi ngaipen pa chu ana hikha in kalunggel alamdang lheh jeng’e. Ajehchu kaloipa Liencha hi Lhingneo toh jong hatah a kilungset a kichengding dinmun a umlhon ahitai. Liencha in nungah chom ana helding chu ka-mang a jong kamat phahlou, tah jong katahsanlou ahiye. Kagelleh Liencha toh loiphatah kahi jeh a keikom’a kithopina athum hitei din kagel tan, mi hetsahlou a chingthei tah a boldin kagel tan ahi.

Dongma kopthei kitichu mi-bolthei ahiding chula hetsa ahi’n, Esther jong chu hinkho a ding a kalungset nahi tai tia ana kitahsan sah ahi. Esther in ana tahsan tah jeh chun alungthim pumpi ngapnan ana neitan, lungdang anagel tapoi. Hinlah a-innsung miten jineisah ding atiu thu Liencha kom’a aseidoh ni’a kipat chun Liencha in Pathen lhacha khat toh marriage abol ding chu ana phatsah pehtan Esther chu kikhenpi ding ana ngaito khatan ahi. Esther in Liencha kom’a vel ijat alungset dan ho aseipeh vang in Liencha in donse in anei tapon, Esther ding chun ahahsa lhehtan ahi.

Liencha chu muntin a dongma nei ahijeh chun kikhen ding jong imachan agelpon, Esther vangchun alungthim leh atahsa pumpi kiphaltheng a ana lungset ahitah jehchun Liencha dalhah a midang toh kichen ding mong mong agel thei tapoi. Thu umdan jouse kahetjou chun kalung adong in seiding jong kahethei tapoi. Esther hinkhoman ding dan kagelleh kapona in imacha la kabol thei dehpoi. Liencha chung’a lunghan jeng ding jong kaloi ngaitah ahikit jeh chun kagel theipon, kadongman in aphat phatnan kaseipeh jo tai. Kagelna lam jouse aboiyin lunggel dan ahahsa lheh jeng’e. Hiphat chun Esther kom’a ‘lungkham hih-in, ken aphat phatnan hin ngaito nange’ kati peh in inn kahung kile tan ahi.

Inn kahung lhun chun phat sotpi kakigel in hinlah geldoh pen aumthei dehpoi. Liencha kom’a kaga cheji lela Lhingneo toh aki-lhakang khapon Esther thu patdah nathei ahijipoi. Alangkhat ah Esther in phatseh in phone eihin bol’in, keiding chun ahahsa lheh jeng’e.

Hahsa lheh jong leh kaseilou hithei lou ahitah jeh chun Lhingneo umloukah kave lhi le tai. Nikhat chu Lhingneo potdoh kah in Esther hinkho genthei dan ho kaloipa kom’a chun kasei in kakilep-kakilep lhon in ahileh kahung kilepsang kha lhon tai. Kakiniel nalhon achun Liencha jong ahung lunghang tan, O’sangthim tah in “Esther bon nalungset a na-khotuo theileh Lhingneo khankhuo ding nagel phah lou ham?” tin ahinseidoh in hiche pettah chun Lhingneo ahunglut kha chet-e. Kakinielna thu lhon phabep pi ajahdoh phatchun Lhingneo jong alungnom tapon, aboncha kaseipeh lhon din angeh tai. Lunghan toh lhaset akop in Esther thu kaseipeh lhon din achuti katho jeng tan, hinlah adonbut ding johsang kaumlhon tapoi. Chutia aka-ka phatchun kenjong Esther hinkho mandan abonchan kaseipeh in kahung kipotdoh tai.

Hiche nikho chu kaloikhat chung a kalunghan napen hita din kagel’e. Inn kalhun chun kaki gel in bolthei pen la kageldoh tapoi. Esther khankhuo ding kagel leh kapona in, Liencha le Lhingneo kikah suhboi ding jong hahsa kasah kit-e. Hiche kahlah achun lunggel ding dan jong hetheilou in kaum in imut ding kagot vang in ka-imu theipoi.

Chutia lunggel hahsa tah a kaumlai chun Liencha ahung vahlut in pung kavet leh jan 11:00 lam ana hitai. Ahung sunglhah lhah chun chomkhatpi kihoulou in kaum lhon in achainan “Bhai, imajouse kei thepmo ahi… kana bolkhel lheh tai. Hijehchun tunvang apha ding ahipouleh nang sei sei boljeng inge” tin ahin seidoh-e. Hiche asei chu keidin lungkham kibecheh na ahijo tan, a-donbutje jong kahevah poi. Aseijou chun “Bhai, chutia naki gellhah jong leh aphae; hinlah Lhingneo khankhuo ding nagel pehlou hitam?” tin kadong in ahileh “Lhingneo in imacha gelse ponte” tin eihin donbut in hiche kajah a kipat vang chun kapohgih ijat hamkhat kilamang abang tai. Thu umdan jouse jong kangaito khom lhon in chujouvin amajong akile kittan ahi. Hiche nilhah chun hoitah in kakigel in ajing a Esther kom gache din kaumtai.

Ajing’a Esther te inn kajot chun Chekon Bazar a Dorcus kom’a LD copy khat kahin kilah pa’n kache in ahileh a-inn’u kaphah phah chun Esther-pa in ka-magazine choi chu ala in ave’e. Chomkhatpi avetjou chun “Hiche magazine jonghi aphachom khat kajih-e tilou’u ahidan dan in Fiction…Fiction…” ahin tin fiction chu keijih ahilam ahetlou ding jeh chun imacha’n kadonbut poi.

Chomkhat jouvin magazine chu avekit in “Um, Hostel warden fiction…” tin ahinseikit-e. Hichun keijong kaki timjou tapon “Hepa, fiction hochu ipi ati nati ham?” tin kadong in ahileh “Thupha-thuhoi khatcha jaolou, zum jong kisalou uham!” tin eihin donbut in keiding chun agel hahsa lheh-e. Khongaisot louvin “Abang le BOC noti ho thu pou, abang leh mi-kisa chavai ho thupou…” tin isahlou tah in ahin seibe kit nalaiyin ahileh angaije jong kahe tapoi.

Hichun kenjong “Hepa, hiti hohi atah a sohthei, sohjong sohji ahi” tin kaseiyin ahileh “Nu hillou, pa hillou ho chung’a ipiba chuhda ding ham?” tin ahin seiye. Hichu kagel kit in “Hepa, mi-chavai ho chung sehseh a thilse soh ahipoi; Pathen lhacha ijat hamkhat chate chung a jong thilsoh melse tahtah chuhda ahipoi” tin kagah seibe in ahile dih asa in hinlah amaho jong chu Pathen phate a ginglou hidin asei teiteiye. Esther-pa hin hitobang vangset na hohi mi-kisa chavai ahilou leh Pathen kituptah a houlou ho innsung bou’a lhungji dan a agel’a ama innsung a chulou beh ding bang’a agel ahi. Chutobang lunggel anei jeh maimai a magazine a thu kiso ho amusiet jengchu gelkhel kasa lheh in hinlah ei-hiltheichi ahilou jehchun seiding kahepoi.

Hinlah mitoh kiniel bep deulou khat kahijeh chun kadonbut teitei in ahileh kahung kinielsang khalhon tai. Chutia kakiniel laitah lhonchun Esther innsung ahunglut in amajong seiding helou in thipbeh in amohtou jeng tai.

Kakihaniel chehcheh lhon phat chun keijong kalung ahung soudoh khatan lungchang khut-a kichoiyin “Hepa, mihem khatchu Pastor-Reverend ahiman’a aji-achate phajeng’a, ju-le-sa aneh man’a phamo jengding ahipoi. Mihemcheh akihi in koima achamkim aumpoi” tin kasei tan ahivang in ama innsung chu a-uu thou thouve. Hichun kenjong “Jingkah-nilhah a maicham’a chate khoukhah man’a chate jouse phajeng ding ahipon, hillou a ikoi man’a sejeng ding jong ahidehpoi. Hil hat a pha aumin, hillou a phajong tampi aum’e” tin kasei kit in ahileh ei-nielbe tapoi. Hiche kasei chaichai chun Esther chu kakoh zangpet in “Hepa, Esther hi chanu changkhat a nanei a nakineppi mama chu ahi. Ahileh tutua adinmun hi nahet em?” tin kadong paitan ahileh amaiso ahung kikhel jah jengtai. Alangkhat a Esther chu kavet le dahdoh ngam louvin akunchahkheh tan nommo kasah lheh jeng’e. Hinlah akisei ngalle kiseichai hen tin kahung khenem in O’nem heuchan “Hepa, Esther hi nang in tahsan tah-a hou-dantheng’a jineisah ding nagot ahin, ama anompoi. Hichehi aseidoh ngamlou jeh-a genthei tah-a hinkho aman ahi. Mipa lhingset khat nahileh ipiti na-chanu khatseh seh lunggel jengjong nahet themlou ham? Hepa, nang musietna a ksei ahipon, mihem koima ichamkim pouve tina a kaseijoh ahi” tin kasei in ahileh eihinve in amaiso chu kisonlal nan adimtai. Hichun “Hepa, ipipi hile marriage nikho jong sot talou ahijeh in agan nathei pen’a Esther lungnoplou nahi Kanu toh nahetcheh lhon angaiye” tin kasei in, chule kahouset naho jong ngaidam kaki thum in innlam kajon tai.

Nilhah chun kaki ngaito in ahileh kei-le-kei hatah in kaki oimo-e. Liencha le Esther kikah sucham ding’a kiche a Esther-pa toh kaga kinah chu themmo kakichan lheh jeng’e. Abang leh ‘ka-kin nalou in kaga kikum’e’ tin kageljin phamo kasah lhehji. Hitichun lunggel jatchom chom kagel in imut ding jong gellou in kaki gelden tai.

Jan ahungsot tan, imu ding kisa in mobile sms kagah vetleh “Heu, thil jouse Hepa kom’a kaseidoh sohkei tai” tin ana kisun in hitia aseichun apa in ipiti adonbut tadem tin kalung aboilheh jeng’e. Hiche thu chu gelpum in lupna chung’a kakigel-kakigel in ahile chomkhat jouvin call ahung in kagah houpi le “Boi, jing Sunday ahi’n nakiman theile hung kholaileng tei tei in” tin ahin seiye. Hiche kajah chun kaki phalam in gah-donbut ding kagot leh kadonbut masang in “Boi, napa in kahouna ho chu kahetthem loujeh ahi; lunghang hih-in” tin ahin seibe kit-in kenjong “Hepa, kalung ahang poi, keijoh in kahouna hochu kaki phalam’e” tin kadonbut-e. Chujou chun “Boi, nanaonu hinkho thahsem nading ahin nang jong napan lou akhoh tai, hijehchun boilheh jong le chun nanaonu khankhuo ding hin gel tei tei’o…” tin ahung taotho jeng tan ahileh hiphat chun keijong seiding helouvin “Heng’e hepa, hung nang’e” kati peh tai. [to be continue…..]***