Society phatvet hi vecheh leohen kati’e! Hichepi hi ve lechun nalung alhai nadem?

Gollhang chapang class XI simding khat kaumna kom’a ahung um in; ahung umtil chun mi phatah hidin kagel’e. Umchanje athem in, ahina ding dolbep chan aumji. Inn-saan a umgel kahi lhon’in, kei umna room bantah a um ahi. Hiche inn a kaumna chu ahung sotthim tan mihem ajat jat toh kana umkhom khatai. Hijehchun midang ahung um sang in eimi simlai khat ahung umchu pha kasah lheh jeng in mipha ahinah leh phaten ki-kivoppi nante tin kagel’e.

Room chom chom a um kahilhon vang chun kaa kijom ahijeh in thu kisei ho aki kijahto peh’e. Nilhah ahung hichun mikhat toh phone in akihou in kangai-kangaileh nungah toh kihou ahichu hetdoh thei ahipai tai. Chomkhat jouvin loudspeaker in ahin koikit nalaiyin akihou nalhon akon chun amin Stephen ahi kahin hetdoh be’e.

Jingkah lam’in “Stephen, janlhah kihou chu anop toh-e na” tin kagah dai in ahileh kiphalam thim tah in ahung nui in iman eidonbut poi. Hiche nia kipat chun akihoupinu toh chun nilhah seh tobang in akihou jing lhon tan, ama phone bol chun eisuboi lheh ji. Phoding la kikiha hetgil loulai, inn-saan a umgel ma akihi jeh in ima kasei theipoi.

Kijahnom hen kijahda jong leh kaa kimat a kium ahijeh chun ei-mitoh ikihou jong le aman ajah, ama phone bol jong en kija tei ahi. Hitichun nilhah seh in akihou jing lhon tan ahileh kinai cheh cheh abang lhon tai. Khatvei vei teng Stephen room achun akihoupi ji nu chu ahungjin aumkhom ji lhon’e.

Hitichun aum jing lhon tan ageden koum jong aumji tai. Numeinu jong student ma ma, phai a inn-saan a um ahikit-e. Chutia jan kisen agekhomji lhon chu gel hahsa kasah lhehtan, hinlah phoding kadetthei lou jeh in kakimoh hetmo sah ji tai.

Hinlah Meilhei lah a inn-saan a umgel akihi jeh in anjo leh min hin hedoh kha’nte tin kadip achahlheh ji. Hijehchun khatvei “Stephen, naumna a hungkeiji nu chu koi hai?” tin kagah dong in ahileh, “Koichu nasei… Aw! Kanaote hichu o, ipiti ham Heo?” tin eihin le doh in kenjong “E, ima tidehlou pi… anjo leh inn neiten koiham tin hindong khaleh kati ahi” tin kadonbut-e. Chutia kahoupi ni a kipat chun numeinu chu ahung lam kanung hetkhah tapon, pha kasah lheh jeng’e. Ahin phone a kihou vang anga deh lhonpoi.

Stephen hindan chu kavet leh mi-bang’a nomsa ahilou vang in akham chabep in akimangcha in nom asah lheh jeng’e. Jeep-Car toljou hihih jong leh koima otcha louva hing ahijeh in matric chaijou til hinkho sung’a anop laitah chu tiding ahimaiye.

Nikhat a-innchen umdan kadoh leh chapa changkhat, anu-le-apa’n kineppi tah a lou natoh a lekha asimsah ahidan kahin hedoh tan, kenjong phate a nulepa kinepna hetpeh din katilkhou’e. Chutia khatvei vei katilkhouji jeh chun eihin ngamsum jep jep tan, loile gol bang’in kaumkhom thei lhon tai. Inn apat anme-ima ahinpoh jong leh eihin geldoh tei jin, kaki ngailu lheh lhon’e. Ahin phone call bol a nungah toh kihou vang apontho cheh cheh jeng’e.

Janthim-janlai a nungah toh phone a akihou jing chu keidin ahahlheh jengjin, hinlah gollhang-chapang ahi nahlai jehchun iman kahouse jipoi. Imu theilou leova eilha jing vang chu anom ji hihbeh’e. Adeh in jan khangkim don leh thumanlou louho a nungah ho toh akihou ji chu pasal cheh akihi jeh in athoh hahsa ji.

Lha nga-lha gup la ache tan, aumchan akhel loubeh phat chun jankhat koimong mong toh kihou ji a hichan chan hi houlim thei ham tin kangai gunset tan ahileh hiche jan chun nungah li toh akihou in, akihoupi jouse kom’a chun amin achomcheh ahiji. Hichun kenjong Stephen chu itobang mi ahi ding themkhat kahin hechen jep kittan, phamo kasah lheh’e.

Jingkah in themkhat beh akichihthei nading tin “Nao, namin pi hi Stephen ham, John ham, Helien ham, Seiboi ham?” kahe thei tahih-e tin kagah hou in ahileh “Heo, tulai chena dan’a umdoh dan tahi… Kamin jong abon a seiding hileh notebook khat a list lah masat ngai inte” tin kihisah tah in eihin donbut in kenjong ima kaseibe tapoi.

Aphat nakhat chu hiche nia kipat chun phone call bol ahung khesuh tan, pha kakipah lheh jeng’e. A-innkote avil a ahung teng kei eidoh teijiu ahijeh in Stephen phatding chu kei mopoh na dan’in kagel tan, hijehchun janthim-janlai a phone call bol angah chu pha kasah dehset’e. Ahimong in jong i-eimi chankhompi ahijeh in aphat ding kadeisah lheh jin ahi.

Phone la aha bolkhah beh tapon, nungah toh ahung kilhon lut lam jong kahekhah tahih in ahileh koima hetlou in kaki tai keiji. Chutia Stephen phatding bou thupi sahna a kalunggel jing lai chun jankhat pam chenom in kathou in ahileh awgin tobang khat kaja in guhthim cha a kanailut a kangai lhihle leh leitol ninglang khat a Stephen mitoh phone a kihou anahi.

Mobile phone in pung kagah ve in ahileh jan khangkim jou khovah kon lam ahitan, kalung adong lheh-e. Kalungdon manchun Stephen phone a mitoh akihou chu kangai tan ahileh kapho ji jeh a kei imutjou lang le bou phone call abolji ahidan athusei a kon chun kahedoh tai. Hichun chomkhat pi kakigel in eija jeh ahidem, ahilouleh ei kichat jeh joh ahidem tin kei le kei question kakibol’e.

Gah suhboi ding chula nomthei kasah pon, kangai be nahlai a ahile aumna a nungah ho jong hung da ji hilou a kei umlou kah le bou chance alah ji ahidan kahin hetdoh be kit nalaiye. Chujong leh numeiho ahungji keu’u hilouva ama jong numei ho inn a gache ji nalai dan ahikit’e.

Kathou nalou kei chun Stephen phone bol chu kajan ngei in ahileh ah-masa ahung khong tan, hichun kalupna kahin kijot tai. Kalupna mun a chun imu theilou in kaki gel in ajat jat kagel doh ji. Pho ding kati le la isopi hingal lou katin, a-insung mite kom a seiding jong nomthei kasah kitpon, ajo-jonan asosoh kiso tante tin kagel tai. Hinlah donda ding jong Stephen vetsui chu kei mopoh na dan’a kakigel ahitahjeh chun kalungthim anom thei dehpon, kigellhah na pen kanei thei tapoi. Ahinkho ding kagel le pamai kasah in; ama jeh a numei-chapang khohelou ijat hamkhat asset ding jong kapona’e.

Chutia kigellhah na pen umlou a lunggel kasatkah laitah chun guhthim chan ahung in a-room sung ahung lut tai. Meivah jong avah pon, khovah kon ahitah vang chun agolgin chu lumding kisa hileh akilom lheh-e. Hiche pettah chun ka-room a kipat in “Stephen, abon uva nan houpi chai hinai moh!” tin kagah houpi in ahileh eihin le-donbut tapoi. Kasopi bang bang a kagel a kangailut anahi jeh chun kalung jong ahang thim tan, “Na nungah kihetpi jouse toh hin cha neile chun Tata khat beh dim talou ding ham nah!” tin ka-enghou kit in; ahivang in imachan eidonbut dehpoi. Hichun ajahkham bep ding in “Mihem hinkho hi kichep na ding ahipoi ti vang hetjing ngai hichu…” tin kaki imut tai.

Hiche ni a kipat chun ei jachat tan, eimu pou pou leh amai amuol jeng jin, eihou ngam tapoi. Inn a jong aumkha beh tapon, khatvei vei ahung ji kalval in a-room sung a aumkha tapoi. Hoilai a iti hinkho aman gakhol luoi luoi ding chula ahithei pon, ahinkho-man chu kagelkhoh lheh jeng ji.

A-classmate khat kadoh le class chu regular tah ahilou vang in ahung ji thou nai atingal kit-in, hoilaiya ipiti hinkho aman ji ahi vang aseidoh deh poi. Phat chomkhat setpi inn a umkha beh lou a hinkho aman jing phatchun inn neiten nommo asah tauvin michom umsah ding lung ahin gel tauve. Alunggel uchu kei kom’a ahung sei uvin ahileh kenjong nommo kasah in khatvei ken hindong tadi inge tin kasei tai. Ajehchu class XII achaikon lang ahitan, school kai kichai kon lam’a inn akhel ding chu boi-um kasah ahi.

Inn neite lunggel ding jong kahet them jeh chun Stephen nung kadap le le tan ahileh inn saan ma ma a um nungah khat kom a gehji ahichu kahin hedoh tai. Houset ding la kadetthei tahlou jeh chun chance kave lhi le in inn ahung ni khat’in inn neite lunggel chu kaseipeh in; inn akhel nomlou leh inn neite toh phate a kihou din kasei peh tan ahi.

Hichun aman jong inn neite kom’a seithei thei in asei in aumlhung ham ham’e.

Stephen in class XII ahinchai a a-room adalhah jou sotlou laiyin eimi ma ma nupa ni ahung umkit lhon tan, ken jong numei-pasal umkhom ahingal leh nupa ahi ma aphajo’e tin kagel in koima hetphah peh lou in pha kasah lheh kittai. Ahung umthah teni chu khangthah thim ahilhon nalaiyin cha jong ahin kipoh lhonpoi. Pasal pa sepai pang ahi kahin hetdoh chun tolop sang eimi khattoh kiumkhom tading ‘hahsat-genthei kom a eikithopi thei’ tin pha kasah lheh-e. Phat ong umpet dung moh kihoulim lim na dung ah Stephen hinkho man kapohnat dan ho kaseiyin kaki houlim lim jiuve. Stephen hinkhoman kaseiji teng ama nin jong phamo asahlheh ji lhon’e.

Hitichun phat ahung chal chal kittan ahileh ahung umthah nupa teni jong chu kahin gingmo pan kittai. Ahinkho mandan lhon chu hoitah a study kabol leh khatvei vei imalou them them pouvin ahung kinaji lhon in, melse tah tah in aumji lhon’e. Adeh in pasal pa chu ju ahung hakham thim nileh akhoh dehset ji. Ju akham ni dung a ajinu ahouna hochu kangai jin ahileh ajinu chung a lungkimlou jeh a judon toh abang ji.

Aumna room lhon achun aphatseh in aumji lhon pon, adeh in jan leh ajinu bou aumna atamjo ahiji. Aki lungset pet lhonle la Romeo-le-Juliet abang ji lhon in, akitomo kah lhon le ui-le-kel abang kitji lhon’e. Chutia nupa hinkho aman lhon chu kadetmo lheh ji.

Aumchan lhon chu kalung atheh cheh cheh phat in koima hetlou vin aumchan lhon chu kavelhi jing tan ahileh aji um-le-um hung umkhom lhon ahidan kahin hedoh tai. Alang alang a akhomi teu kadoh le Pasal pa chu aji-acha um; numei nu chu ahileh ajinei na a kon hung jam’a ajipa toh achungthu theng loulai ahi kahin hechen tai.

Aji umgel lungngam tah a nupa dan’a innsan akilah lhon’a aumkhom theilhon chu kadetmo lheh’e. Hinlah seibe ding aum dehpoi. Chutia aumkhom jing lai lhon chun Sunday nikhat nupi khat in nao ahin kipoh in ajinu chu ahung bulu tan ahi. Aumchan lhon chu pasal pa chun ave in khat teni akibot phoi deh deh jeng lhon’e. Nupi nao hin kipoh nu chun “Najah chalou hija mi ji toh hitia hi umngam nahim…” tiho vel in attack abol jin ahileh khat nu chun “Mi duhdah nahi nahle naji kisen ki control joulou a naum ding ham…” tin counter-attack agah bolkit ji’e.

Hitichun chomkhat setpi asalah lah uvin chujou in amahei amahei in aki chemang gam tauve. Hiche ni jan chun kaki gel in aum masa pa la ichom ahipon, anunung teni la akhohcheh kit’e tin ka-khovah deh’e. Stephen chu anule apan kineppi tah a lekhasim dia phai a aumsah lhon ahi’n, vannoi numei toh akivop lam chu hepha lhon ponte. Alangkhat ah akivoppi nungah ho jong chu anute-apate in chanu tahsan umtah a anei’u hisoh kei ding kaging cha’e. Innsaan a um teni jong kanung mukhah lhon tapon, hoija iti lhon hitam tuchan in kahepha tapoi.

Hiche kana to nahi Kum phabep pi ache tan, hoitah a kanung gel gel le i-society uva hi semphat loulai khat um ahiding kahin geldoh in phamo kasah lheh-e. Chuleh hiche tobang ho hin society sung a thil phalou tampi asosah ding ahijeh in nommo kasah in; alonaje la kahedeh poi. Hijeh hin Nampi semphat nadin society hi Nampi phatvet in gel’u hitin vecheh leohen kati’e. Hiche pihi ve mong mong lechun nalung alhai nadem?

(*Laijon Digest, October 2013)